Nongpoh, Lber 31
Kumba 44 tylli ki ïing ki la julor na ka jingwan ka ‘erlangthari kaba jur ryngkat bad u slap ha ki shnong kiba hap hapoh ka Jirang konstitwensi ha ka Sngi U Blei, la ïathuh ka khubor na u Block Development Officer (BDO) ka Jirang C & RD Block u Dr. Pabitra R Hajong.
Utei u heh ophisar u la pyntip ba ha kane ka jingjia, kawei ka longkmie ba la tip kyrteng kum ka Khuni Killing ka la mynsaw bad ki shnong kiba la shah ktah jur eh ha kane ka jingwan lynshop ka ‘erlangthari ki kynthup ïa ka shnong Umsalani bad ka Umsaliang.
Nalor kitei ki shnong la ïoh jingtip ruh ba ka la don ruh ka jingshah pynjulor jong ki ïing ki sem bad ki jingthung-jingtep ha ka shnong Nongrim Jirang.
La ïoh jingtip ruh ba ka surok kaba leit sha ka shnong Umsaliang, ka la shah khangdam syndon na ka jingshah pynkhyllem jong kiba bun ki dieng ki siej ha ka ‘erlangthari kaba la wan kynsan-kynsan ha kane ka sngi.
Halor kane ka jingjia shah lynshop ‘erlangthari, na ka liang jong u BDO ka Jirang C& RD Block, u la bthah ïa ki nongïalam jong ki shnong kiba shah ktah ba kin lum jingtip halor ki jingjulor ha ki shnong ki thaw ki jong ki.
Nangta u la kyntu ruh ïa kito kiba shah pynjulor ïa ki ïing ki sem ba kin sah shwa shipor ha ki ïing skul bad na ka liang ki bor sorkar ki dang ïaleh ban pynbiang ïa ki lad ai jingïarap ba kyrkieh.
