Raphael Warjri
Ki don ki longïing kaba dang bat niam tynrai bad ki dei ruh na ka kur basan bakhraw kaba don la ka sad ka sunon jong ki lyngdoh ha la shnong, hynrei namar ba la khraw ka khaïi pateng ha nongbah Shillong, ki la leh bym suitñiew ïa ka sad ka sunon namar ba ym don jingmih kaba myntoi kum ka khaïi ha sor. Kane ka rukom teng teng ka jia ruh kum kaba tynneng rongphong ïa ka juk mynta ban ñiewbeiñ ïa kiei kiei kiba la buhti ki longshwa manshwa. Ka lah ban long ba ki lehraiñ ruh ban pynpaw pyrthei khamtam lada dei ba tyngkhuh bad kiba na shabar jylla. Ban kdew beit plak na mationg, ka long thik kum kito kiba pynpaw ba angnud ban pynneh ïa la ka tynrai lajong da kaba spongkhor bad boh khaila ha la ki paila ki kynjri tabah bad sa kieng pat sa u tai u jaiñsyngit na pdot jong ki shynrang briew.
Ka long kaei kaei kaba long khongpong ha ka rukom pyrkhat jong ki briew ha ka imlang sahlang ha kaba ïadei bad ka jingim ba manla ka sngi bad ka snap shimet kaba paw sha ka pyrthei. Haba bishar ka dei ba man la ki briew ha lade shimet ki pyrkhat bad ki pynlong ïa kiei kiei baroh ba kin jia katkum ba kan biang ïa lade shimet, ïa la ka longiing longsem bad ïa la ka jylli lajong. Ki shynrang kiba pyrta ban pynksan ïa la ki para shynrang briew, ki klet ba dei ka kmie kaba dei ka kynthei kaba kha ïa ki bad ki sin ki rngop kyllum ïa ki kynthei ha ka imlang sahlang. Ki kynthei kiba pyrta shla ban pynksan ïa la ki para kynthei briew, ki klet ba dei na u kpa ba ka kmie ka sa lah ban pun ban kha ïa ki bad ki sin ki rngop kyllum ïa ki shynrang ha ka imlang sahlang. Hynrei ka ba kham khim mynsiem shuh shuh ïa kata ka dei ka jinglong ban pynroh bad kjeh tang ïa lade, da kaba pyrkhat ramia ba kiwei kiwei ki khlem lah ban leh ïa kaei kaba ki dei ban leh na ka bynta jong ki. Kum kine ki briew kim ju kwah ban leh sbun ei ei ïa kiwei namar ba ki ngeit ba dei tang ma ki kiba donkam tam ha pyrthei bad kiwei kiwei ki dei hok ban pynbiang ïa ki kat kaba ki angnud. Kumba la kdew ha shwa ba ki don ki shynrang kiba ieit la ka tynrai da kaba pynirong ha ka riam ka beit tynrai, hynrei ki kham sngew phuhmat lada kyntiew kyrdan la ka riam tynrai da kaba sy-ngit u tai na pdot. Na ka liang ki kynthei lei ki bun kiei kiei ki rukom tynneng ba lah ban kdew haba ka khmat bhabriew ba thaw ka mariang la tap bula bad sbur da ki rong jlah jong ka juk phuh bthuh ba mynta.
Kaei kaba long khongpong ha ka imlang sahlang ka don ka pansara na kiwei pat ki jait briew kiba don ka mynsiem ban len lade na ka bynta ban biang kiba bun balang. Kum kita ki briew kim salia wat ban syrtok ïa lade tang na ka bynta ban suk ban ikmen kiwei kiwei ha ka imlang sahlang.Lehse na ka shihajar ne shiphew-hajar lah ban don tang da ki phew ngut. Kita ki phew ngut kiba kheiñduh ïa lade ban bha ka imlang sahlang barabor ki long kiba jar jar ha la ka kam. Ka pyrthei ka biang na kita ki phew ngut ban ïaid beit ïaid ryntih na ka bynta ban biang pylla ïa kaei kaei kaba lymbiang ba la pynlong da kita ki hajar bad phew hajar ngut kiba kynriang. Kata ka lah ban long namar ba ka jinglong briew ka don ka jingïatip lem kaba dei ban paw da kaba bha bad kaba dei hakhmat ka imlang sahlang, hynrei ki kam buitpoh pat ki long jar jar ha kaba ym lah ban paw paidbah bad bunsien ka sah umdum ba ym lah ban ring saiphla ïa kita ki ba leh kynriang. Ha kawei pat ka liang ka ju don pynban da ka ba pharep lamler ban kynnoh sniew ïa ki briew kiba lui lui ba shida. Jar la katta ka hok bunsien ka ïeng rasong ban pynksan ïa kiba bha bad pynrem ïa kiba sniew, hynrei teng teng ka lah ban long khongpong ruh. Ki don ki khep ba ki riew bymman ki lah ban buhrieh ïa la ki kam buitpoh kam thala, da ka ba ïaineh kum kiba bha hakhmat ka imlang sahlang. Ki don ruh ki khep ba kiba lehbha ki shah pharep lamler haduh u pud ba ki paidbah ki kynnoh khlem nongrim ban shah pynrem shiryta.
Dei halor kine kiei kiei ki jinglong jingman ha ka imlang sahlang ba sa mih ki kynhun kiba ïaleh ban teh lakam ïa ka imlang sahlang na ka bynta ban pynbha ïa ka longbriew manbriew. Ki kynhun kiba haphrang eh ha kane ka liang bad kiba la rim bah naduh mynnor ki dei ki seng niam bad hadien sa mih ki sengbhalang bad ki kynhun ba synrop ha ka nongrim jong ka jingsngewthuh hapoh la ka jylli jong kata ka kynhun. Man la kawei pa kawei ka niam ki don ka jingthmu babha ban shakri ïa ki paidbah na ka bynta ban ïeng rasong ka hok bad khyllem ka pap. La don ha kata ka juk ba ki riewkhuid Hindu ki ba la pynman blei ïa ki ki ba la mutdur kum ki briew kiba dei ki riewblei ba phylla kum u Shiva, Vishnu, Ram, Krishna, Durga, Kali, Saraswati bad byllai kiwei kiwei ki riewblei kiba don la ki khana ha ki khanatang Hindu kum ka Ramyana, Mahabharata, Bhagavat Gita, Vedas bad kiwei kiwei ki khana kiba la mihpli kum ki kot bakhuid ha kane ka juk mynta.
