Shillong, Lber 31
Ka Khasi Students’ Union (KSU) Sengkmie ka la bthah ïa ki dkhot jong ka Coordination & Welfare Committee, Shella Bholaganj bad jaka ba marjan ban wan mih markhmat ym ban shu jler bad jaw ummat kuratia ha khmat ka sorkar bad ka pyrthei lyngba ki lad pathai khubor.
Na ka liang ka seng ka la ong ka jingpharep pyrshah ïa ki dkhot ka KSU da kine ki poi-ei lyngba ka CWC ka pyni dak ba kine ki briew ki kob pyrshah ïa ka KSU da kaba ïalam bakla ïa ki paidbah khlem ki sakhi-satar kiba paka.
Ka KSU ka kob ïa uta u Gopal Dey ba lada u nud un wan mih markhmat bad ki dkhot ka seng ban pyni ïa ki sabut ba u don halor ka jingkynnoh jingpharep jong u pyrshah ïa ki samla ka seng. Mano uta u Gopal Dey? Une u briew bad kiwei ki la mih ha ki lad pathai khubor ha u snem 2020 hadien ba ki jaidbynriew ki jong ki, ki la hiar thma kynsan ïa ka jingïalang pyrshah CAA bad dawa ILP jong ka KSU ha kaba da ki phew ngut ki dkhot ka seng ki la shah tied shah bom ha kine ki poi-ei da ki tiar ïaleh tad haduh ba la pait ka khlieh bad lyngkien ka snam ha surok bad kumjuh ruh ka jingbthat jubor ïa ka jingim ba kordor jong u Bah Lurshai Hynñiewta uba dei dkhot ka KSU Sohra Circle.
Halor ka jingujor ejahar bad pynher shithi sha u Myntri Rangbah ka jylla ha kaba ka CWC ka la kynnoh laiphew jait ïa ka seng bad ki paid Khasi, Ka KSU ka pynsngew sha baroh kito ki bar jylla kiba don hapoh ka shatri jong ka CWC ba kin tyngkan u thylliej ïoh poi sha ka mynsaw namar ka seng kan ym shong kli-kti bad sngap kuman ïa ka jingber bih kine ki bar jylla nalor ba ki thom naphang ïa ki Khasi trai ri-trai muluk.
Kumta ka seng ka ong ba lada ka CWC ki sngew kutlad palat ha jylla Meghalaya ki dei ban leit phai noh mardor sha shnong trai lade (ka Bangladesh) bad sa leh katba ki sngewmon ha ri lajong. Tangba katba ki dang sah ha Meiramew u Khasi kan bha shibun ïa ki bad ki jaidbynriew jong ki ban ym mushlia lane tuklar ïa ki aiñ ki kanun Khasi, ka khyndew ka shyiap u Khasi, ka khaïi- pateng u Khasi bad ka ïaid ka ïeng u Khasi.
Ka seng sa shisien ka pynsngew ba nalor ka jingdawa ïa ka ILP, ka Article 371, ka jingpynkup bor shuh shuh ïa ki District Councils ka dawa ruh ba ka Cut-off date lane tarik ot kyrteng ïa ki nongshong shnong ba pura ka jylla Meghalaya kan dei beit naduh ka 24 tarik u Lber 1971 bad ïa kito kiba wan kiew na East Pakistan/Bangladesh hadien kane ka tarik dei ban bret noh ïa ki sha la ka ri kata ka Bangladesh.
Kyntang ïa wai ka seng ka kyntu ïa ki para Khasi ba kin ym ngop lane shah ïalam bakla ha ki khubor hamsaïa jong ki bar jylla lyngba ki lad pathai khubor lane social media namar kane kan pynpait bad pharia ïa ka Jaidbynriew rit paid Khasi. Ka buit sianti ki bar jylla ka long ban pyni ba ki shah thombor (playing the victim card) katba napoh- napoh dei ma ki kiba sdang ban kynshoit ban thombor ïa ki Khasi kumba dang shu jia shen ha Keating Road bad NEHU.
“Kum ka Jaidbynriew ngi dei ban ïatylli ban ïa ryntih ha kum kane ka saw ka siañ ha kaba ka umsaw kaba shyrkhei ka ap ban taplup ïa ka Jaidbynriew rit paid Khasi”, la ong ka kyrwoh.
Shuh shuh, ka seng kan ym ailad da lei-lei ruh em ïa ki bar jylla shi sngi ban leh trai khlieh ha Ri Khasi. Kam pher lada shah bom shah tied, shah set along ne wat ban ïap ruh, hynrei ki dkhot ka seng ki tur beit da ka jingshlur ban ïada ïa la ka Jaidbynriew ba la suit la shor da u mynbarim.
Khatduh khatwai, ka KSU ka maham ba lada kata ka Meghalaya Minority Linguistic Development Forum kan pynlong jingïakhih ha Bri U Hynñiewtrep, ka KSU ruh kan ïakhih lang halor ka jingshah pynïap klep bad jingshah thombor ki Khasi na ka por sha ka por ha ki bar jylla. Kane ka long katkum ka kyrwoh khubor na u Donald V Thabah, General Secretary ka Khasi Students’ Union.
