Shillong, Ïaïong 01
Ka Seng Khasi Kmie, Mawkhar Shillong ha ka 1 tarik u Ïaïong 2024, ka la pyndep ïa ka bynta jong ka lehniam pynkiew ksing, kaba long ka sngi jong ka dak ban pynriew ïa ka ksing ka nakra ka bom ka tangmuri, ban pynbna ïar sha u paid jong ka Bri Hynñiewtrep Hynñiewskum, jong ka jingwan ban poi ka aïom ka shad ka kmen ha ka dur ka shad ainguh kata ka Shad Suk Mynsiem.
Mynta ka kynti ïa ka Shad Suk Mynsiem, ne ka shad ainguh aidem ïa U Blei Trai Kynrad kan long ha ki lai sngi, kata ha ka 13, 14 bad 15 tarik mynta u bnai ha lympung shad ha madan Weiking, Jaïaw, Shillong.
Ïa ka lehniam pynkiew ksing la pyndep ha Hall jong ka Seng Khasi Kmie, ha kaba ïa ka nguh ka dem ka khnong ka bishar la pyndep ïa ka da u dkhot ka Kynhun u ‘riew tymmen ‘riew san ka Seng Khasi Kmie u Rgh Donbokstar Kurkalang.
Kiba la wan ban sakhi lang ïa kane ka sngi lehniam jong ka pynkiew ksing ki kynthup naduh u President bad General Secretary ka Seng Khasi Kmie u Rgh O Pyngrope bad u Rgh Hainess Marbaniang, ryngkat ki dkhot ka Jylli Pyrkhat Kam (JPK) bad ki dkhot ka Seng Kynthei, katba ïa ka jingïalang baroh kawei la pynïaid da u Rgh DL Nongbri Vice President Seng Khasi Kmie.
Ha kane ka kynti ka kynhun ki duhalia kiba ka Seng Khasi Kmie ka la ibit ïa ki ban pyndep ïa ka put ka tem ka jong ki, ka dei shi kynhun ki samla kiba la dep ban pyntbit bad pynjanai ha baroh ki sur ksing ne skit ka kynthup ïa ki khynnah Na Tbian Ki Sur Hara ka kynhun ka La Syrdoh.
Hadien ba la dep ka nguh ka dem ka shat ka kheiñ ka khnong ka bishar da u ‘riew tymmen ‘riew san, la sdang ban tem put ïa baroh ki hynñiew skit, kum ka dak jong ka jingsdang ka jingpynkhreh-jingpynkhrum ïa ka Shad Suk Mynsiem mynta ka snem.
Kumba ka ju long ka sur ksing ba nyngkong ba la tem bad pynsawa ïa ka dei ka ‘Ksing Lumpaid’ ka dak jong ka jingïalap bad wer ïa u kur u kha u marjan-marpa najan bad najngai ba ka sngi ka ïa jong ka shad ka kmen ba shisien shi snem kane ka la wan poi, da kumta ban long kiba la pynkhreh na ka bynta ban ïashim bynta sha kane ka shad ka kmen.
