New Delhi, Ïaïong 01
U Myntri Rangbah ka Delhi, u Arvind Kejriwal ha ka Lah Sngi U Blei u la shah rah noh sha Tihar Jail, ha kaba yn buh ïa u ha patok kaba 2. Hashuwa, ka ïingbishar ka la phah ïa u Kejriwal na bynta 14 sngi ha patok halor ka jingkynnoh ba u la ïadon bynta ban ïasylla ha ka jingpynmih ka Sorkar Delhi ïa ka ‘Liquor Policy’ lane ka jingpyntreikam ïa ka rukom die kyiad ha nongbah Delhi.
Utei u khlieh nongïalam ka AAP uba la shah kem ha ka tnad Enforce -ment Directorate (ED) ha ka 21 tarik Lber, un sah marwei ha len shipai bad hapdeng ka jingkhmih jong ka CCTV baroh 24 kynta. Ha kajuh ka por, la pynkhlaiñ ïa ki bor pahara ha ki phyllaw jong ka Tihar Jail.
Yn pynbiang ruh ïa ki dawai-dashin ïa u Kejriwal ha ryngkat ka bam ba kyrpang ha patok namar ka jinglong-jingman koit ka khiah. U lah ruh ban rah lang ïa u jingdeng niam uba u ju deng.
Ka Rouse Avenue Court ha Delhi ka la ai ïa ka rai hadien ka jingkut noh ka jingshah tohkit u Kejriwal ha ka tnad Enforcement Directorate (ED) ha ka 1 tarik u Ïaïong.
Ha ka jingtian bishar hynne ka sngi, u Additional Solicitor General, S.V. Raju, uba mihkhmat ïa ka tnad ED, u la ong ba ka ‘agency’ kam shym la pan shuh na bynta ka jingset patok da kaba buh jingmut ïa ka rai ba dang shen jong ka Supreme Court haba ïadei bad ka mukotduma u Myntri barim ka Tamil Nadu, u Senthil Balaji.
U Raju u la ong ba ka jinglong u Kejriwal hapoh ‘lock-up’ kam long kaba lah ban ïatreilang bad ki jubab jong u ïa ki bor pynïaid ki long kiba kyllaiñ. U la kam ruh ba u Myntri Rangbah ka Delhi u ïalam bakla ïa ka jingtohkit halor katei ka mukotduma ba ïadei bad ka kyiad.
Ha kawei ka liang, ki nongsaid aiñ u Kejriwal ki la phah ïa ka aplikeshon ban shah ïa u Myntri Rangbah ka Delhi ban rah 3 tylli ki kot – ‘Bhagavad Gita’, ‘Ramayan’ bad ‘How Prime Ministers Decide’ da ka nongthoh khubor, Neerja Chaudhary – ha patok.
Shuh shuh ka Delhi High Court ka la bthah ïa ka ED ban phah ïa ka ‘Status Report’ hakhmat ka Trial Court lyngba ka Public Interest Litigation (PIL) ban kyrpad ha ka ban pyrkhing ïa u Kejriwal ban pynmih hukum ne jingbthah na patok.
Kumban shu kdew hangne, u Kejriwal u la shah kem ha ka 21 tarik, Lber ha ka tnad ED hadien ka jingtohkit ha ïingsah jong u. La phah ïa u sha patok jong ka ‘Federal Agency’ haduh ka 28 tarik Lber. Hadien kane, la pynjlan shuh sa 4 sngi bad ka kut mynta ka sngi.
La wan ïalam ïa u Myntri Rangbah ka Delhi sha ïingbishar shi sngi hadien jong ka jingïaid paidbah ka liang pyrshah hapoh ka shatri jong ka INDIA kaba la long ha Ramlila Maidan kum ka dak ban pyrshah halor ka jingshah kem jong u.
Da kane ka jingshah kem, u Kejriwal, uba ïalam ruh ïa ka Aam Aadmi Party (AAP), u la long u Myntri Rangbah (uba dang don ha ka shuki) banyngkong tam ha ka Ri India u ban shah kem.
