Shillong, Ïaïong 01
Kum shi bynta ban pynthikna ba ka jingpynlong ïa ka ilekshon, ka ban long ha ka 19 tarik mynta u bnai, kan long kaba ïaid beit ïaid ryntih, ka Election Commission of India (ECI) ka la phah haduh 40 pyrton ki Central Armed Police Force (CAPF) sha Meghalaya.
Ïa kane la pyntip da u Chief Electoral Officer (CEO) ka Meghalaya u Dr. B.D.R Tiwari haba kren sha ki lad pathai khubor, ha kaba u la ong ba ka jylla ka la ïoh haduh 40 pyrton ki Central Armed Police Force (CAPF) ban pahara ha kane ka ilekshon sha ka ïingdorbar Lok Sabha.
U CEO u la ong ba napdeng ki 40 pyrton, 5 pyrton ki CAPF ki la don lypa hapoh ka Jylla, bad pyntip ba shen yn wan poi sa kiwei ki pyrton katkum ka por ba la buh.
Shuh shuh u la pyntip ruh ba ki la dep ban pynkhreh lut nadong-shadong haba phai ha kaba ïadei bad ka jinglong-jingman jong ka shongsuk-shongsaiñ. U CEO u la ong ba na ka liang ka tnat ka la dep ruh ban ïakren ïa ki kam khappud, ha shuwa jong ka ilekshon bad na ka liang ka ECI ruh ka la dep pynmih ïa ki jingbthah kiba donkam bad na ka liang ka Meghalaya ruh la dep ïakren bad ki jylla kiba marjan.
Ha kawei pat ka liang, u CEO u khlem ai ïa ka jingdon ki ‘polling station’ kiba don jingma bad kiba lah ban pynmih jingkulmar ïa kiba la dep ban ithuh da kaba ong ba ‘ka nombor ka lah ban kylla”.
Nalor kane, u la pyntip ba ki la don ar tylli ki jingujor ba la ïohpdiang haba ïadei bad ka jingpynkheiñ ïa ki kyndon ka Model Code of Conduct (MCC).
Haba kylli ba ki dei ki jingujor kiba kumno, u CEO u la ong, “Ïa kine kiei-kiei phi lah ban pan jingtip na ki Deputy Commissioner bad kine ar tylli ki jingujor ki dei kiba la ïohpdiang lyngba ka C-vigil bad la dep ruh ban bishar ïa ki.”
