Shillong, Ïaïong 01
U Chief Electoral Officer (CEO) ka Jylla, Dr. B.D.R Tiwari, ha ka Lah Sngi U Blei u la ong na ka bynta ban ïaid beit ka jingthep ‘vote’ bad kan nym don ka jingpynthut ha ka leit ka wan ki nongthep ‘vote’, la dep bthah ban pynbiang lut ïa ki jingdonkam ha ki polling station.
U CEO haba kren sha ki lad pathai khubor u la ong ba ki jaka thep ‘vote’ baroh ki don 3,512 tylli bad kiba mih thymmai ki long 32 tylli. U la pyntip ruh ba na ka liang ka tnat ilekshon ka la don ka jingïalang bad u Chief Secretary ka jylla ban ïakren, ban peit bad pynbiang ïa ki jingdonkam baroh ha ki jaka thep ‘vote’ kum ka bording ka um bad ki jaka leit bar.
“Ngi kwah ban pynthikna ba ka leit ka wan kam dei ban shah ktah bad ba dei ban pynbiang ruh ïa ki jaka rieh slap bad kiwei-kiwei ki jingdonkam ha baroh ki Polling Station na ka bynta ka bit ka biang jong ki nongthep ‘vote’ ha ka sngi thep ‘vote’,” u la ong.
U CEO u la ïathuh ruh ba ha man ki MLA konstitwensi la buh 3 tylli ki Flying Squad, 3 tylli ki Static Surveillance bad 3 tyllli ki Video Surveillance. Kane ka long na ka bynta baroh 60 tylli ki MLA Konstitwensi kiba don ha ka jylla.
Ha kawei pat ka liang, u Dr. Tiwari u la pyntip ba ha kane ka sngi la lum ïa ka jingïalang bad ki seng saiñ pyrthei bapher-bapher bad kane ka jingïalang ka dei kaba la pynlong haba ïadei bad ka jingpynbeit ïa ka por ba ki seng saiñ pyrthei kin pathai ïa ki khubor jong ki ha ka All India Radio bad ka Doordarshan.
“Namar kata, yn sa ai ïa ka ‘voucher’ jong ka por da ka Election Commission of India ïa ki National bad State Political party ba la ithuh,” u la ong bad bynrap ba ka jingïalang ka long ruh ban batai ïa ki ba kumno ki lah ban ïoh ïa kane ka jingai por jong ka ECI ba kin pathai ïa ki khubor jong ki sha ki paidbah na kine ki lad pathai.
Ha kajuh ka por, u CEO u la pyntip ba namar ka Meghalaya ka dei ka jylla jyrngam, ka ECI ka la rai ban shim ïa ka lad ha kaban pynlong ïa ka ilekshon kaba jyrngam.
“Mynta ka suiñ bneng ruh ka biang bha ban thung dieng, kumta ngi la shim ïa ka lynti ban ïathung dieng ha kaban pynlong ïa kane ka ilekshon kaba jyrngam bad ban sah jingkynmaw. Ha man kawei-pa-kawei ka jaka thep ‘vote’, ngin sa thung ar tylli ki symbai dieng bad kito ki ban thung ïa kine ki dieng kin dei na ki nongthep ‘vote’ shynrang bad kynthei kiba wan thep ‘vote’ nyngkong eh,” u la bynrap.
U CEO u la pyntip ruh ba kat haduh ka sngi kut ka sngi thep kyrteng ki kyrtong kata haduh ka 27 tarik u Lber baroh ki nongthep ‘vote’ ha ka jylla ki don 22,26,567 lak ngut. Ki shynrang ki don 10,99,517 lak ngut bad ki kynthei ki don 11,02,747 lak ngut bad ki ‘transgender’ 3 ngut, bad ki nongthep ‘vote’ kiba don ha ka kam ki don 3,870 ngut.
