Shillong, Ïaïong 01
Hadien ka jingshah lynshop bad shah pynjulor na ka jingwan jong ka ‘erïong ha ka janmiet Sngi U Blei ha ki shnong bapher-bapher, u Myntri Rangbah ka Jylla u Conrad K Sangma ha ka Lah Sngi U Blei u la pyntip ba ka Sorkar ka la dep bthah ïa ki Deputy Commissioner (DC) jong ki District bapher-bapher ba kin pyndep lut ïa ki jingai song jingïarap ïa ki lanot shah lynshop ‘erïong hapoh ka 48 kynta.
Haba kren sha ki lad pathai khubor, u Myntri Rangbah u la pyntip ba la dep ban bthah ïa baroh ki Deputy Commissioner ba kin shimkhia bad leh ïa kiba donkam ban pynpoi ïa ki jingïarap sha ki lanot kiba la shah ktah na ka jingwan lynshop ka ‘erïong bad u ‘lapbah ha ka janmiet Sngi U Blei ha kylleng ki bynta jong ka Jylla. U Myntri Rangbah u la pyntip ba ka Sorkar ha u snem ba la dep, kum ka kpait saiñ kam bathymmai, ka la pynkup bor ïa ki Deputy Commissioner ba kin pyntreikam ïa ki song jingïarap haba don kano-kano ka jinglynshop jong ki bor ka mariang.
“Kumta, ki Deputy Commissioner kim donkam shuh ban wan sha nongbah Shillong ban ïoh ïa kano-kano ka jingbit bad ki la lah ban shim hi ïa ka rai ha la ka jong ka kyrdan, haba phai sha ka jingsam ïa ki marbam, ki tiar ki tar ban shna ïing kum ka nuksa ki CGI sheet bad kiwei kiwei,” la ong u Conrad bad bynrap “Ngi la ai ka jingtreikam ba laitluid sha ki DC bad ngi la ai ruh ïa ka song pisa sha ki ba kin ïarap ïa ki lanot.”
Ha kajuh ka por, u Myntri Rangbah u pyntip ba u Chief Secretary ka Jylla u la shong bishar kam ha ka step Lah Sngi U Blei halor ka jinglong-jingman ha baroh kawei ka Jylla bad la ai por ïa ki Deputy Commissioner ba hapdeng ka 24 kynta haduh 48 kynta la khmih lynti ba kin pyndep lut ïa baroh ki jingai jingïarap.
