California, Iaiong:
Katkum ki khubor la ong ba uwei u heh nong Israel uba la ithuh kum u Liron Petrushka bad ka kurim ka Naomi, ki la khlad noh na ka jinghap bakla ka liengsuiñ hapoh ka nongbah California ha ka Sngi Saitjaiñ.
Ki bor pyniaid ka California ki la pyntip ba kane ka la jia ha ka miet jong ka Sngi Saitjaiñ katba kitei shi kurim ki dang shong ha katei ka liengsuiñ kaba dei ban leit hiar sha ka Kad Liengsuiñ Truckee Tahoe kaba don sha ka phang Shatei jong ka nongbah California hajan khappud Nevada.
Ki bor pyniaid ki iathuh ba katei ka liengsuiñ ka dei kaba mih na ka Kad Liengsuiñ Denver jong ka Colorado ha ka janmiet jong ka Sngi Saitjaiñ ha ka por kumba 4:20 nohphai sngi.
Ha ka jingpynbna ba la pyllait da ki heh ka Kad Liengsuiñ Truckee Tahoe, la iathuh ba ka tnat National Transportation Safety Board (NTSB) bad Federal Aviation Administration (FAA) ki dang wad bniah halor katei ka jingjia bad ka daw jong katei ka jingleit hap bakla katei ka liengsuiñ ha katei ka miet, ha kaba baroh 2 ngut kitei kiba shong hapoh ki la duh noh syndon ia ka jingim. Kitei ki heh ki la iathuh ruh ba katei ka liengsuiñ ka dei ka ‘Single-engine TBM N960LP’ bad ka bym ju kham pynthut ha ki por ba la leit.
