Shillong, Ïaïong 01
Uwei heprit ba dang 3 snem eiei ka rta u la duh noh la ka jingim bad haduh kumba 80 tylli ki ïing ki la shah pynjulor ha ka ‘erïong kaba wan ha ryngkat u ‘lapbah bad syllad naphang ha ki shnong bapher-bapher ha ka janmiet Sngi U Blei ha ka Eastern West Khasi Hills.
Katkum ka khubor ba la ïoh lum, la ïathuh ba ka ‘erïong kaba jur bha ka la wan lynshop ha ka por mynmiet bad bun bah ki ïing ki la shah pynjulor ka tnum.
U Sordar ka shnong Thangmaw haba batai halor kane ka jingjia u la ïathuh ba tang ha ka miet jong ka Sngi U Blei, ar sien ka ‘erïong ka la wan syllad ïa ki bynta jong ka shnong, kata kaba nyngkong ka dei ha ki por kumba 7.30 eiei ha kaba ki jingjulor ki kham duna. Hynrei ha ka por 9 duna eiei ka la wan biang ha kaba ka jingjulor ka la long kaba bun bah kynthup ïa ki ïing hapoh ka shnong, kumjuh ki sem sniang, ki sem syiar ki jingthung-jingtep ki la julor.
Ka ‘erïong ka la jynrat ruh ïa ki dieng ki siej ha ki lum bad ki khlaw jong ka thaiñ bad la sakhi ïa kane da ka jingkhyllem jong ki dieng ha shilynter ka surok.
La ong ruh ba ha ka shnong Mawroh Laitdom, uwei u heprit ba 3 snem ka rta, u la duh noh la ka jingim hadien ka jingshah ban ha ka ïing kaba shah rah ha ka lyer. Une heprit u dei uba kyrteng u Vicky Lawrynniang.
Ka kmie jong utei u heprit ka la ïathuh ba ki don baroh san ngut ha ïing bad ka jingwan ka ‘erïong ba jur ka la rah noh ïa ka ïing ryngkat ïa ki khun jong ka baroh bad bret pat ïa ki sha surok.
Ïa une heprit uba la mynsaw jur ha kane ka jingjia, la pynkit noh sha Laitdom PHC hynrei hadien u la khlad noh namar ka jingjur ka jingmynsaw.
Na ka liang ka shlem treikam u Block Development Officer (BDO) ka Mairang, u la phah ïa ki briew na shlem treikam ban leit lum jingkheiñ ïa ka jingpynjulor jong ka ‘erïong hapoh ka thaiñ baroh kawei.
