Shillong, Ïaïong 01
Ka Laitjem CC bad ka Pomshutia CC ki la ïoh jingjop ha ka lympung ïalehkai 3rd District League T20 Cricket Tournament 2024 ba la pynïaid da ka East Khasi Hills Cricket Association ha ka Lah Sngi U Blei.
Ha kane ka jingïakhun kaba la long ha ha Shortimai Syiem Stadium kaba ha Smit, ka Laitjem ka la pynliem noh ïa ka Nongdawah CC da 5 wiket. Ka Nongdawah kaba la kam trai ba tied nyngkong, ka la kamai 116 run bad shah pynhap 10 wiket ha ki 18.2 over. U Moonlight War u la tied 29 run na 22 bol. Katba u Pynbhalang Kharsati u la shim 4 wiket na ka bynta ka Laitjem.
Haba wan shimti ïa ka pali kaba ar, ka Laitjem ka la lah ban kynjoh sha ka thong da kaba kamai 120 run bad shah pynhap 5 wiket ha ki 15.1 over. U Marken B Kharkongor u la tied 26 run na 23 bol. Katba u Maïalang War u la shim 2 wiket na ka bynta ka Nongdawah. Ïa ka nam Player of the Match la khur da u Pynbhalang Kharsati.
Haba phai sha kawei pat ka jingïakhun kaba ar, ka Pomshutia ka la jop 3 run ïa ka Smit CC. Ha kane ka jingïakhun ka Pomshutia ka la kam trai ban tied nyngkong bad kamai 143 run na bynta ban duh 6 wiket ha ki 20 over. U Aristerwell Suting u la tied 44 run na 43 bol. Katba u Raymond Thabah u la shim 3 wiket na ka bynta ka Smit.
Haba wan beh ïa ka tong ka Smit ka la kamai tang 140 run bad shah pynhap 8 wiket ha ki 20 over. U Miningstar Mylliemngap u la tied 39 run na ki 34 bol. Katba u Skhembor Khongbtep u la khur 2 wiket na ka bynta ka Pomshutia. Ïa ka nam Player of the Match la khur da u Aristerwell Suting.
