Libya, Iaiong:
U Myntri Rangbahduh jong ka Libya- u Abdulhamid al-Dbeibah, u la shah thmu thombor ha ka Sngi U Blei ha kaba ki bom ‘Rocket-Propelled Grenade’ (RPG) ki la leit poi sha ka jaka sah jong u ha katei ka sngi hynrei ka long kaba donbok ba ym shym la don ba ngat ne mynsaw ne khlad na katei ka jingjia.
La ong ba katei ka jaka sah jong utei u nong-ialam ka la shu julor katto-katne ki bynta hynrei kiba shong shapoh kim shym la ngat ne shah ktah eiei.
La ong ba ki don ki nongshong shnong jong katei ka thaiñ kiba la ïohsngew ia ka jingsawa jam ka jingbthei kitei ki bom najan Hay Andalus jong ka Tripoli.
Bad ki paidbah nongshong shnong ki la iathuh ba tang mar ia ïohsngew hi ia katei ka sur jingsawa kaba jam, la ïohsngew ia ki kali pulit bad ki kali jong ki bor pahara kiba la leit her mar-mar sha katei ka jaka ban leit peit thuh bad pahara ia katei ka jaka khnang ban pyllait ia utei u nongialam na kino- kino ki jingma kiba ap ia ka jingim jong u.
Tad haduh kane ka step Lah Sngi U Blei ba la pyllait ia kane ka khubor, ym pat shym la ioh jingtip mano kita kiba don kti ha katei ka kam thombor pyrshah ia utei u nongialam jong katei ka ri.
Kumta ka tnat iada jong ka Libya ka dang phah ia ki tnat wad bniah ba kin wad jingtip ba bud dien ia katei ka kam thombor, ka jingthmu bad ki nong-leh lane kiba don kti ha katei ka kam thombor kaba la buh jingma kaba khraw ia utei u nong-ialam ba hakhlieh duh jong ka ri.
