New Delhi, ïaïong:
U MP barim jong ka AAP na Patiala kaba don ha Punjab, u Dharamvir Gandhi hynnin ka sngi u la leit ban pynïasoh bad ka seng Congress ha ryngkat ka jingdonlang ki heh nongïalam jong ka seng ha New Delhi. Kane ka jingkyntiap seng jong u ka la long shwa ka ilekshon Lok Sabha.
U Gandhi u lah ban ïakhun kum u kyrtong jong ka seng Congress na Patiala konstitwensi. U Dharamvir Gandhi u la jop ha ka ilekshon Lok Sabha kum u kyrtong jong ka seng AAP ha u snem 2014 ha kaba u la pynrem ïa u Preneet Kaur na Patiala. U Gandhi, hadien kane u la mih noh na ka seng AAP ha u snem 2016 bad thaw da ka seng lajong ka Nawan Punjab Party, ha kaba u la ïatreilang bad ka seng Congress hynnin ka sngi.
Ki nongïalam jong ka seng kiba kynthup ïa u Pawan Khera bad u nongpynïaid jong ka AICC na ka bynta ka Punjab, u Devendra Yadav, u heh nongïalam jong ka seng Congress ha Punjab u Amarinder Singh Raja Warring bad u nongïalam jong ka seng CLP u Pratap Singh Bajwa ki la pdiang burom ïa u Gandhi hapoh ka seng. U Bajwau u la ong ba ka seng Congress kan sa nang khlaiñ bor da ka jingleit pynïasoh jong u katba u Warring u la ong ba ka jingleit pynïasoh jong kum kine ki briew kiba la shemphang bha ka long ka dak jong ka jingkyrmen na ka bynta ka seng ba kan nang kiew.
