Shillong, Ïaïong 01
Ka United Hynñiewtrep Movement (UHM) ka pynrem jur ïa ka jing-kynthoh bad jingkynnoh ba khlem nongrim jong ka Coordination and Welfare Committee (CWC) pyrshah ïa ka KSU halor ka jingshah pynïap klep jong 2 ngut ki bar jylla ha Ichamati ha ka janmiet jong ka 27 tarik u Lber mynta u snem.
U President ka seng, u Bah Charlie J. Rani ha ka kyrwoh khubor u la ong ba ka seng ka maham jur ïa ka CWC ban padiah khlem nongrim ïoh ba kane ka ïalam pynban sha ka thma kaba heh.
Ha kajuh ka por, ka seng ka buh jingkylli na ka Sorkar Jylla la hato ki mynder kiba la shim ïa ka jingim jong u Bah Lurshai Hynñiewta (Bam kwai ha dwar U Blei) ki lah shah pynsaja ne em katkum ka aiñ nalor ba lah tip tikna ba dei ma ki kiba leh ïa katei ka kam bymman.
“Hato ka Sorkar ka la ïoh kem ïa u Vicky Dey uba la byrngem ïa ka KSU kumjuh ïa ka jaidbynriew Hynñiewtrep ban pynïap klep ïa ngi. U kyrwoh ba shai lyngba ka UHM sha ki bar jylla bad khamtam ka CWC ba wat pynbor ïa ngi ki dkhot jong ka jaidbynriew Hynñiewtrep ba ngin shim ïa ki sienjam ba tyngeh lyngba kane ka jingtei pop ïa ka KSU bad kumjuh ïa ki dkhot ka jaidbynriew jong ngi haba ka aiñ ka don ban bishar,” la ong u Bah Rani.
Ka seng ka maham ruh ïa ka Meghalaya Linguistic Minority Forum (MLMF) ba ka dei ban sangeh mardor ïa ka jingthmu jong ka ban shong kyllaiñ mungor ha Khyndailad namar kane kan long pynban kumba theh umphniang ïa ka ding kaba dang klang mynta.
“Lada ka Sorkar kan ailad ïa kum kine ki jingthmu jong ka MLMF, kan sa poi sha ka jingïapher jaidbynriew bad kan sa mih ruh ka jingïa pyni bor bad lada jia kano-kano ka jingjia ba sngewsih lyngba kane, ka Sorkar kan hap shim hi ïa ka jingkitkhlieh,” u la ong.
Ha kawei ka liang, ka UHM ka pynrem jur ïa ka Sorkar Kmie halor ka jingpyntreikam ïa ka Citizenship Amendment Act (CAA) bad kumba ka jaidbynriew hi baroh kawei ka pyrshah, kumta ka Seng ruh kan ïai pyrshah ïa kane ka aiñ ïakjakor.
Shuh shuh u la bynrap, “Ka seng ka dawa ba ka Sorkar Jylla ka dei ban shimkhia ban pynsngew sha ki tyndong shkor jong ka Sorkar Kmie ba kam dei ban pyntreikam ïa kane ka aiñ hapoh ka Jylla Meghalaya, ba ha ka jaka jong kane, ka dei ban pyntreikam noh mardor ïa ka Inner Line Permit (ILP), ka jingpynrung ïa ka ktien Khasi haka Khyrnit ba Phra jong ka Riti Synshar ka Ri India, bad ban pyntikna ïa u pud u sam ba biang.”
