Nongpoh, Ïaïong 01
Da ka jingsngewkhia halor ka jingshah pynjulor jong bun ki ïing bad ki jingthung jingtep ha ki shnong bapher bapher jong ka Jirang konstitwensi na ka jingwan lynshop ka ‘erlangthari ha ka janmiet Sngi U Blei, u MLA ka thaiñ Bah Sosthenes Sohtun u la kyrpad ïa ka sorkar jylla ba kan pynsted ban pynpoi ïa ki lad jingïarap khamtam na ka bynta kito ki longïing kiba la duh ïa la ki ïing ki sem bad ki jaka sah.
Haba kren sha ki lad pathai khubor ha ka Lah Sngi U Blei, u Bah Sosthenes Sohtun u la ong, u dap da ka mynsiem sngewkhia bad sngewlem sha kito ki longïing kiba la shah ktah na ka jinglynshop ki bor mariang ha kiba bun tylli ki shnong kiba hap hapoh ka Jirang konstitwensi bad ïathuh ki don napdeng kine ki longïing kiba la duh ïa la ki ïing ki sem kiba hap ban leit sah bad la ki para marjan, ha ki skul, ki ïing dorbar hapdeng ki jingeh kiba bun.
U la ong, katkum ka jingtip ba thikna, ki shnong kiba la shah ktah ki kynthup naduh ka Pahamumsaliang, ka Umshalini, Rani, Gunpati, Jalukpaham, Matang, Umsohpai bad kiwei kiwei ki shnong kiba ym pat ïoh satia ïa ka jingtip ba thikna naba ym shym la lah ban leit jurip mar-mar.
U MLA u la pyntip ruh ba nalor ka jingshah rat jong ki ïing, ka don ruh ka jingduhnong kaba khraw ha kaba ïadei bad ki jingthung-jingtep ba kynthup naduh ki dieng kwai, ki dieng jri bad kiwei kiwei kiba la shah pynjulor ha ka ‘erlangthari.
U Bah Sosthenes u la ong naduh hynnin ka janmiet u la ïoh ban ïakren bad u Deputy Commissioner ka Ri Bhoi, u Arpit Upadhyaya, u Block Development Officer ka Jirang C&RD Block ban shim jingkheiñ jingdiah halor ka jingduhnong jong ki paidbah bad ruh ban phah ïa ki lad jingïarap kiba kyrkieh sha ki paidbah kiba la shah ktah.
Shuh shuh, u la ïathuh ba u la ïoh ban ïakren bad u Symbud Myntri Rangbah ka jylla, u Bah Prestone Tynsong bad kiwei ki heh sorkar ka jylla, ha kaba la kyrpad ba kin shimkhia bad ïarap kyrpang ïa ki paidbah jong ka thaiñ kiba la mad bad duhnong ha kane ka jingjia.
Une MLA u la kyntu ïa ki paidbah kiba la shah ktah ba kin long kiba ïaishah katba na ka liang ka sorkar jylla lem bad ki bor pulit ruh kumjuh ki dang ïaleh ban poi sha ki shnong ki jong ki, da kaba ïathuh ruh ba ki don ki jaka ba la shem jingeh ban poi namar ka jingkhyllem jong ki dieng ki siej kiba la khang dam ïa ki surok. Wat la katta ruh, na ka liang ki bor ba dei khmih ki la shimkhia ïa kane ka bynta bad kyrmen skhem ba ki paidbah kin ïoh ïa ki lad jingïarap kiba biang ha ka por kaba biang.
Ka jingwan lynshop ka ‘erlangthari ym tangba ka la wanrah jingjot ha ki shnong ki thaw kiba hap ha ka Jirang konstitwensi, hynrei la ïoh jingtip ba bun tylli ki ïing kiba hap ha ka thaiñ khappud Block II jong ka Mawhati konstitwensi ruh ki la ngat lang ha ka jingshah pynjulor.
Ki lai tylli ki shnong kiba la shah ktah jur ha ka thaiñ Block II jong ka Raid Nongtung ki kynthup ïa ka shnong Ummat I, Ummat II bad ka Nongsder ha kaba la ïoh jingtip ba kumba 28 tylli ki ïing ki la shah rat ryngkat ki jingdon-jingem nalor ka jingduh jong ki jingthung- jingtep ym tang na ka lyer hynrei na ka jinghap jong u phria ruh kumjuh ha kiba bun ki shnong ki thaw jong ka Ri Bhoi.
U Bah Blikshon Sohtun, President jong ka Synjuk ki Rangbah Shnong Border Area jong ka Raid Nongtung haba pyntip ïa kane ka jingjia sha ki nongthoh khubor, u la ong ba kane ka jingwan lynshop ba kynsan jong ka ‘erlangthari ka la ktah shisha ïa kiba bun ki longïing jong ka thaiñ, kiba la kylla khlem ïing khlem sem tang ha ka shikyllipmat.
U Bah Sohtun da ka jingsngewkhia halor ka jingmad jingeh ki paidbah na kane ka jingjia, u la kyrpad sha ki bor sorkar ba kin pynlong ïa ka jingwan jurip kaba mardor bad ban pynbiang ïa ki lad jingïarap kaba kyrkieh sha ki lanot kiba la shah ktah ha kane ka jingwan lynshop ki bor jong ka mariang.
