Shillong, Lber 29
Hadien ba mih ka jingkynnoh na ka Coordination and Welfare Committee (CWC) Shella Bholaganj Block and Adjoining Area pyrshah ïa ka Khasi Student’s Union (KSU) ba ki dei ki dkhot kane ka seng kiba la donkti ban pynïap bad shim ïa ka jingim jong ar ngut ki bar jylla kaba la jia ha ka 27 tarik u Lber ha Ichamati, na ka liang ka Hynñiewtrep Achik National Movement (HANM) ka la leit ban ujor da ka ejahar pyrshah ïa u President jong katei ka Committee, u Gopal Dey ha u SP ka East Khasi Hills halor kane ka jingkynnoh khlem nongrim jong u ïa ka KSU.
Haba kren sha ki lad pathai khubor ha ka Lah Sngi U Blei ha Shillong Press Club, u Bah Wraimon Sohtun uba dei u Assistant General Secretary ka HANM, u la ong ba ka jingkynnoh jong katei ka ‘committee’ khlem ka jinglah ban pyni ïa ki sakhi ki sabut kiba biang ka long kaei-kaei ka bym lah satia ban pdiang.
“Na ka liang jong ka seng HANM, ka kren da kaba shai ba ïa kino-kino ki bynta kiba kim lah ban pyni ïa ki sakhi-sabut kiba biang, ka seng kam lah ban pdiang satia”, la ong u Bah Sohtun.
U Bah Sohtun u la ong ba kine ki jingkynnoh ki dei tang ki buit jong kino-kino ki Jaitbynriew kiba kwah ban pyntroiñ ïa ka seng KSU da kaba ki kynnoh thamula khlem da don ïa ki sakhi-sabut kiba biang.
Ka seng ka la ong ba wat la kam kwah ban pynheh ïa katei ka jingjia kaba la jia ha Ichamati hynrei namar ka jingkynnoh khlem sakhi jong katei ka ‘committee’ ka la pynlong ïa ka seng ba kan bitar bad kum ka seng ka don ryngkat bad ka seng KSU na ka bynta ban ïada ïa ka Bri U Hynñiewtrep.
“Ngim kwah ban pynheh ïa kane, hynrei hadien ba ngi ïohi pat ïa kane ka jingkynthoh ïa kiwei pat kiba dei ki para sengbhalang, ngim lah ban shu kun kumto, hynrei ngi wan hangne ban pynshai sha ki paid nongshong shnong jong ka Jaitbynriew jong ngi ba ngi don ryngkat bad ka seng KSU na ka bynta ban ïada ïa Bri U Hynñiewtrep”, la ong u Bah Sohtun.
Shuh shuh u Bah Sohtun u la ong ba ka jingthoh shithi jong u Gopal Dey sha u Myntri Rangbah ka jylla, u Conrad K. Sangma ban kynnoh ïa ka seng KSU ka pyni kumba u la don ïa kita ki sakhi-satar kiba biang bad kane ka jingleit phah shithi jong u Gopal Dey ka long ka bym ïahap satia.
Ha kaba ïadei pat bad ka jingshah pynïap jong ar ngut ki bar jylla kata u Ishan Singh bad u Sujit Dutta ha Ichamati, na ka liang ka seng ka la ong ba ka shaniah ha ka tnad pulit ba kan leh ïa kaei-kaei kaba donkam bad ba ka aiñ kan treikam kumba ka dei ban trei na ka bynta kito kiba leh ïa kane ka kam pynïap.
Shuh shuh ka seng ka la pynpaw ka jinglyngngoh ruh pat ba ka tnad pulit haduh kine ki sngi kiba mynta kam shym lah ïoh satia ban kem ïa kito ki briew kiba donkti ban shim ïa ka jingim jong u Bah Lurshai Hynñiewta uba dei u dkhot ka KSU.
“Kane ka dei ka kyrwoh kaba shai sha ki bar jylla khamtam sha ka ‘committee’ jong une u Gopal Dey ka long ba wat pharia Jaitbynriew bad wat ong ba ka Jaitbynriew Khasi Hynñiewtrep ka dei ka Jaitbynriew kaba tieng”, la ong ka seng.
Ka seng ka la maham ruh ba lada kino-kino ki bar jylla kim sngewsuk ban shong ban sah hapoh ka Bri U Hynñiewtrep, kitei ki bar jylla ki dei ban mih noh bad ym donkam ban ïakren da kumwei pat.
