New Delhi, Ïaïong 01 (UNI)
Ka Supreme Court ha ka Lah Sngi U Blei ka la pan jubab na ka Election Commission jong ka Ri India (ECI) halor ka mukotduma kaba dawa ba dei ban ñiew lut ïa ki ‘vote’ ne ki ‘slip’ kiba don ha ki Voter Verified Paper Audit Trail (VVPAT) haba ñiew ïa ki ‘vote’ kiba paw ha man ki Electronic Voting Machine (EVM) ha ka jaka ban ñiew tang san tylli ki VVPAT ba la shu jied katba ïoh ha ka ilekshon MLA ne MP.
Ki nongbishar ba kynthup ïa u Justice BR Gavai bad u Justice Sandeep Mehta ki la tyngkhap lang hajuh ïa ka mukotduma ba la ai kham mynshwa da ka Association for Demo-cratic Reforms (ADR).
Ha u bnai Ïaïong 2023, ka ADR ka la dawa ba dei ban pyndait ïa ki VVPAT ha baroh ki EVM ha kylleng ka Ri. Hynrei ha kato ka por, ka kynhun ki nongbishar ba la khlieh da u Justice Sanjiv Khanna, ki la pynpaw ïa ka jingartatien halor ka jingdawa ka ADR ban ñiew lang lut ïa baroh ki ‘slip’ kiba don ha ki kor VVPAT da kaba ong ba kane kan pynkhia ïa ka kam jong ka ECI.
Ki muktiar kiba mihkhmat ïa ki nongmudui ki la ong ba ka ECI ka dei ban ñiew lang ïa ki ‘vote’ kiba don ha ki EVM bad ki ‘slip’ kiba don ha ki VVPAT khnang ban pynthikna ba ki don ka jingïahap. Ha kajuh ka por, ki la dawa ba dei ban pyndam noh ïa ki kyndon ba la ai da ka ECI ha u Nailar 2023 ha kaba ïadei bad ki EVM bad VVPAT.
Ha kajuh ka por, ki la ong ba ka ECI ka dei ban ailad ïa ki nongthep ‘vote’ ban thep hi da ka kti ïa ki ‘slip’ ha ki kor VVPAT. Nalorkata, ki la pynpaw ba ka ECI ka dei ban pynlong ïa ka ïit kaba don ha ki kor VVPAT kaba lah ban ïohi da ki khmat bad ba ka por ba ki nongthep ‘vote’ ki lah ban peit ïa ka ‘slip’ ba ka hap hapoh ka kor VVPAT ka dei ban kham jrong. Shuh shuh la ong ba ka sorkar ka pynlut kumba `. 5,000 klur ban thied ïa kumba 24 lak tylli ki VVPAT, hynrei kumba ka long mynta, la ñiew ïa ki ‘slip’ kiba don tang ha kumba 20,000 tylli ki VVPAT.
Ki la pynpaw ruh ba ha ki ilekshon ba la dep pynlong, ki la don bun bah ki jingbym ïahap hapdeng ki ‘vote’ kiba don ha ki EVM bad ki ‘slip’ kiba don ha ki kor VVPAT, bad namarkata, donkam ban ñiew ïa baroh ki ‘slip’ bad ban ailad ïa ki nongthep ‘vote’ ban thep hi da ka kti ïa kito ki ‘slip’ ha ki synduk thep ‘vote’. Na ka por sha ka por, ki la don bun bah kiba kum kitei ki mukotduma ba la ai ha Supreme Court bad kine ki mukotduma ki la buh jingkylli halor ka jingïaid beit ka rukom treikam ki VVPAT bad ki EVM.
