Shillong, Ïaïong 01
U nongaiktien ka National People’s Party (NPP), Bah Himalaya Shangpliang, u la ong ba ka Sorkar MDA kaba ïalam da ka NPP ka dei kaba la don lypa ki sienjam ban tei ïa ka lawei ki samla bad u la kdew ruh ïa ki kam kiba la pyntreikam ban seng kam bad ban aikam aijam ïa ki samla.
U Bah Shangpliang u la pynpaw ïa kane haba buh jingkylli halor ka jingkam jong ka Voice of the People Party (VPP) ba kan tei ïa ka lawei khlem da pyni kiba kumno ki sienjam kiba lah ban pynurlong ïa ki jingkular.
U la ong ba ka long kaba suk ban shu pyndonkam ïa ka kyntien ban tei ïa ka lawei hynrei khlem ka jingkdew kaba shai kumno yn leh ban pynïoh ïa ka lawei jong ki samla.
U la pyni ïa ki sienjam kiba la shim da ka Sorkar MDA kaba ïalam da ka NPP khamtam ban tei ïa ka lawei ki samla bad jong ka Jylla bad ïa ki briew kiba seng kam seng jam.
U la ong ba ka PRIME ka dei kawei ka Startup kaba la pyntreikam da ka Sorkar Jylla kaba biang bha ha kaba la don kumba 5,500 ngut kiba seng kam kiba ka Sorkar ka la kyrshan bad kane ka jingleh kan ïarap ha ka liang ka aikam aijam.
U la ong ba ki la don ruh kumba 210 tylli ki Startup kiba la kyrshan da ka Sorkar.
Shuh shuh u Bah Himalaya u la ong ba ka Sorkar ka la pyllait ruh sa kawei ka sienjam ban kham pynïar shuh shuh ïa kiba seng kam ha ka ryngkat ka jingkyrshan kaba long hapdeng 35% bad 75% ka subsidy kaba kynthup 19 tylli ki skhim hapoh ka CM ELEVATE.
U la ong ba ki 19 tylli ki skhim hapoh ka CM ELEVATE ki kynthup ïa ka PRIME agri response vehicle scheme, PRIME tourism vehicle scheme, warehouse scheme, sericulture & weaving scheme, common facility centre scheme, piggery development scheme, poultry farming scheme, goat farming scheme, dairy development scheme, sports & wellness centre scheme, cinema theatre scheme, agro tourism villa scheme, bad kano-kano ka business venture scheme.
U la ong ba ki la don 20,000 ngut kiba seng kam yn kyrshan lyngba ka CM ELEVATE kaba la dep mang kumba T. 300 klur bad palat 30 hajar tylli ki aplikeshon la dep ban ïoh pdiang. Une u nongaiktien ka NPP u la ong ruh ba ka Sorkar MDA ka la buh jingkheiñ ban lah ban pynmih kam na bynta 48,500 ngut ha ka kam jngohkai ha kine ki 4 snem haduh u snem 2028 bad ki la don ruh palat 450 tylli ki ïingbasa (homestays) kiba la dep mang ban tei.
U kren ruh shaphang ka jingbuh ïa ka Shillong Tech Park kaba `.62 klur ha ka bynta banyngkong bad ka Shillong Tech Park kaba ar ha Shillong bad kawei pat ha Tura kiba kot da ka spah klur. Namarkata, u Bah Shangpliang u la khot la wer ïa ki samla ban phai sha ka Sorkar haba ïadei bad kine ki sienjam kiba bun tylli kiba lah ban aikam bad ki long kum païa ba skhem ban tei ïa ka lawei.
