Agartala, ïaïong:
Ha kaba ïadei bad ka jingjia kaba sngewsih, ki la don kumba 616 tylli ki ïing ba la julor ha Tripura namar ka jingjur jong u slap bad ka ‘erïong kaba la ktah jur ïa katei jylla ha ka Sngi U Blei. Kumba la ïathuh ka tyllong khubor ba la wan na State Emergency Operation Center kaba don ha Agartala, la ong ba ki la don kumba 37 tylli ki ïing kiba la julor, 125 tylli kiba la jur ha ka jingjulor bad 454 tylli kiba la shu julor malu-mala.
Ka tyllong khubor ka la ïathuh ba napdeng ki 8 tylli ki distrik kiba don hapoh ka jylla, ka Sepahijala distrik ka dei kaba la kham shah ktah jur.
Ki la don kumba 392 tylli ki ïing kiba la julor, kynthup ïa ki 23 tylli kiba ha Jampuijala Sub-Division, 14 tylli ha Sonamura Sub-division, bad 355 tylli ha Bishalgarh Sub-division.
Shuh shuh, ka tyllong khubor ka la ong, ba nalor ka Sepahijala distrik, ki la don 14 tylli ki ïing kiba la julor malu-mala bad kiba la kham shah pynjulor ki dei ha Unakoti, 124 tylli ha Dhalai distrik, 21 tylli ha West distrik, 33 tylli ha Khowai, 24 tylli ha Gomati, bad tang 8 tylli ha South distrik.
Nalor ki ïing, ki la don ruh bun tylli ki dieng kiba la shah jynrat, ki dieng pynïeng sainar ilektrik ruh ki la shah pynjulor, ha kaba kane ka la wanrah ïa ka jingduh bording, ki surok ruh ki la shah khang lynti.
Nalor kane, la sakhi ba ki la don ruh ki kali kiba la julor na ka jingkhyllem ki dieng bad kine ki dieng pynïeng sainar ilektrik.
