Shillong, Ïaïong 01
Ka MLP Combine XI bad ka SP Office ki la jam sha ka semi final ha ka lympung ïalehkai Inter Office Shillong League 2024 ha ka Lah Sngi U Blei ha madan Urkaliar, Shillong.
Ha ka jingïakhun quarter final kaba nyngkong, ka MLP Combine ka la pynliem noh ïa ka Meghalaya Teachers da 21 run. Ka MLP Combine kaba la shimti ba tied nyngkong, ka la kamai 282 run bad shah pynhap 5 wiket ha ki 20 over. U Ganesh Sahani u la ïoh ban khyrwit 108 run na ki 35 bol bad Bishal Chettri u la ïoh 88 run na ki 52 bol. Katba u Richmond u la shim 2 wiket bad shi wiket da u Sanvert B. Kurkalang.
Haba wan beh ïa ka thong ba la buh da ka liang pyrshah, ka Meghalaya Teachers ka la kamai tang 261 run bad shah pynhap 9 wiket ha ki 20 over. U Sanvert B. Kurkalang u la tied 71 run na ki 30 bol bad u Richmond u la ïoh 58 run na ki 18 bol. Katba u Bishal Chettri (Player of the Match) u la shim 3 wiket bad 2 wiket da u Thangkan.
Haba phai sha kawei pat ka jingïakhun quarter final kaba ar, ka SP Office ka la jop da 87 run ïa ka Bhoi Office Combine. Ka SP Office kaba la shimti ban tied nyngkong, ka la kamai 201 run bad shah pynhap 5 wiket ha ki 15 over. U Steve Syiemlieh u la tied 72 run na ki 32 bol bad u Kumar Sewa u la ïoh 63 run na ki 33 bol. Katba u Rijied Star bad u Eric ki la shim mar 2 wiket.
Haba wan beh ïa ka thong, ka Ri Bhoi Office ka la kamai tang 114 run bad shah pynhap 6 wiket ha ki 15 over. U Plielad Makri u la tied 43 run na ki 42 bol bad u Rijied Star u la ïoh 25 run na ki 14 bol. Katba u Bushbashisha bad u Kumar Sewa (Player of the Match) ki la shim mar 2 wiket.
