Pakistan, Iaiong:
Ha kawei ka jingjia kaba sngew shyrkhei, la ong ba uwei u rangbah na Pakistan u la pyniap jubor ia la ka hynmen ha ryngkat ka jingdon lang u hynmen bad kumjuh ha khmat u kpa jong katei ka iing tang namar ka jingpyrkhat ia ka burom jong ka iing ka sem.
Katei ka samla kaba shah pyniap la ithuh kum ka Maria Bibi bad ka dang don 22 snem ka rta. Katei ka samla ka la shah pyniap ha ka por shiteng miet jong ka 17 tarik u Lber 2024 ha la u hynmen uba ju ithuh kum u Muhammad Faisal ha ryngkat ka jingïadon lang u kpa u Abdul Sattar bad kane ka la jia hajan jong ka shnong Toba Tek Singh kaba don sha ka phang pdeng jong ka Punjab hapoh Pakistan.
Ha ka dur-khih kaba la saphriang paidbah, la ring dur hi da uwei pat u hynmen jong ka Maria- u Shehbaz bad ka la saphriang paidbah ha ki rynsan ‘Social Media’ ha kaba la iohi ia utei u hynmen uba la ksih ia katei ka samla ha jingthiah katba u kpa jong katei ka iing pat u dang peitkai ia katei ka jingleh kam be-aiñ jong kitei ki khun shynrang jong u ha katei ka miet.
Ha khyndiat ka bynta jong katei ka dur-khih, la ïohsngew ia u Shehbaz ba u la kyntu bad kyrpad ia u kpa ban phah pyllait bad sangeh noh ia katei ka kam pyniap, hynrei la iohi pat ba uwei u hynmen uba ksih ia katei ka samla, um shym la pyllait ne pynsngap satia tad haduh ba katei ka samla kan da dkut mynsiem syndon hadien kumba 2 minit tam. Bad la ong ba ha ka por ba u Faisal u la dep ksih pyniap ia katei ka para, u kpa jongki u la tyrwa um ia u ban dih namar ka jingthait hapdeng ka jingpynmih bor jong u ban pyndep ia katei ka kam.
Hynrei, la ong ba ki pulit ha ka 24 tarik u Lber, ki dang shem ia katei ka jingshisha ba katei ka khynnah samla kam shym la khlad na kino-kino ki daw kumba la pynda bad buhrieh da katei ka iing, katba baroh ka dei ka jingshim jubor jong ki ia ka jingim jong katei ka samla da katei ka rukom.
Ki pulit ki la kem noh ruh mardor ia u Sattar bad u Faisal khlem da pynslem shuh, katba ia u Shehbaz uba long tang u nongring dur ia katei ka jingjia la kem noh ha kane ka Sngi Saitjaiñ ba la dep ban pyntikna ia ka jingiadon kti bad kumjuh ruh ban tohkit bniah haba iadei bad katei kaba la jia baroh.
Haba la tohkit ia kitei ki dkhot jong katei ka long-iing naduh baroh shipara, ka kmie lem bad u kpa jong ka iing, baroh ki la phla ba dei namar ka jingpynjah burom jong katei ka samla ia ka iing ka sem baroh kawei bad kum kine ki jingjia la ong ba ki long kiba kynrei hapoh Pakistan ha kaba ia ki khun kynthei bad ia ki kynthei, la ju pynbor ba ki dei ban kohnguh ia ka rai bad ka jingpyniaid na iing, la ka long ha ka pule- dangle, ka kam ka jam bad khamtam eh haba iadei bad ka shongkurim.
Katkum ka kaiphod jingkheiñ na ka Human Rights Commission jong ka Pakistan, la ong ba ki la don haduh 316 tylli kum kitei ki jingjia hapoh ka ri ha u snem 2022.
Hynrei kiba bun na kitei ki jingjia, ki dei kiba shu ioh jingkheiñ ynda ka por ka la iaid bad bun hi na kitei ki iing kiba mad ia kum kitei ki jingjia, kim ju pynpaw paidbah ne don ba pyntip sha ki bor pyniaid bad sha ki pulit.
