Shillong, Ïaïong 01
Katkum ka khubor na ki pulit ka jylla, la ong ba uwei u nongshong shnong ïa uba la tip kyrteng kum u Darwin Rupsi, u la ujor ba ha ka 28 tarik Lber ha ka por kumba 11 baje mynstep, ki runar ki bym lah ban ithuh ki la tuh ïa ka pisa kaba don T. 22 lak na ka ïing sah jong u kaba don ha ka shnong Ladrymbai Dongwah ha East Jaiñtia Hills.
Sa ha kawei pat ka jingjia, ka Kong Huntine Synrem, ka la ujor sha ki pulit ba ha ka 28 tarik Lber, ka la don ka jingpynjulor ïa ka jingkhang bah jong ka ïing bad ki almari ha ka ïing sah jong ka ha Mawngap Mawkharshiïng bad la lap ruh ba ka pisa kaba don T. 40,000 ka la jah.
Na ka liang ki pulit ki la pyntip ruh ba u Arel R Marak u la ujor ba ha ka 29 tarik Lber, ki runar ki la tuh ïa ka kali Bolero (AS-01BN-0080) kaba la pynïeng ha phyllaw ïing jong u ha Pillangkata, Ri-Bhoi.
Ha kawei pat ka jingjia, u Sanju Rishi u la ujor ba ha ka 28 tarik Lber ha ka por kumba 11:30 mynstep, ki runar ki bym lah ban ithuh ki la tuh ïa u Remote Radio Unit (RRU) uba shongdor kumba ` 1 lak na ka jaka ba don u Tower ha Koinabui, Dalu kaba hap ha West Garo Hills.
Shuh shuh ki pulit ki la pyntip ba u Silvan M Sangma na ka shnong Upper Sangsanggre, Tura, u la ujor ba ha ka 29 tarik Lber u la lap ba ka thuk-thuk (ML-08F-6793) jong u ka la jah na ka surokbah NH-51, Tura-Dalu Road.
Nalorkata, ki pulit ki la pyntip ba u Bodruzzaman Sarkar u la ujor ba ha ka 28 tarik Lber, u la ïohi ba ki la don ki runar ki bym lah ban ithuh kiba la prong sha ka dukan M/s Zaman ha Sakmal, West Garo Hills, bad ki la tuh ïa ki mar ki mata kiba shongdor kumba ` 3,78,100/.
Sa ha kawei pat ka jingjia, u Sanjib Das u la ujor ba ha ka 29 tarik Lber, u la lap ba ka thuk-thuk jong u (ML-08J-8109) ka la jah na kawei ka jaka kaba don ha Phulbari.
Shuh shuh ki pulit ki la ong ba u Rangjeng G Momin, Nokma ka shnong Jenggitchagre ha West Garo Hills, u la ujor ba ha ka 29 tarik Lber ha ka por kumba 1 baje mynstep, ki nongshong shnong ka Jenggitchagre ki la bat ïa kawei ka kali (AS-01AT-9602) ryngkat bad lai ngut ki briew kiba la shong hapoh katba ki dang pyrshang ban kit ïa uwei u masi bad ban thep ha kali. Hynrei, la ong ba kitei ki briew ki la lait phet noh.
Ha kawei pat ka jingjia, u R Khongwir u la ujor ba ha ka 29 tarik Lber ka la don kawei ka trok (ML-05K-3081) kaba la ñiah da u Kobarsing Rynjah, bad la lap ba kane ka trok ka la kit 16 tylli ki masi kaba long pyrshah ïa ki kyndon jong ka Prevention of Cruelty to Animals Act. Ïa kine masi la aiti noh sha ka tnat ri jingri kaba don ha Pynursla Sub-Division.
