Shillong, Ïaïong 01
Ka lahduh jong ka aïom ba la dep, ka Mawlai SC ka la lah ban pyni ïa ka jingkhlaiñ bor na ka bynta ban bteng biang ïa ka jingjop kaba ar ha ka lympung ïalehkai Shillong Premier League 2023, hadien ba ka la lah ban pynliem noh ïa ka Sawmer SC da 7-2 kol ha ka Lah Sngi U Blei ha SSA Stadium kaba ha First Ground, Polo.
U Donlad Diengdoh (22′, 24′, 57′) u la khur ïa ka hat-trick, katba kiwei pat ki la ïoh ban thep mar shi kol Robert Khongriah (34′), Fairming Suting (74′), Kevin Rymbai (75′) bad u Dajiedlang Wanshnong (86′). Katba u Diego Khriam (10′) bad u Mark Austin Wanswett (88′) ki la lah ban pynphai na ka bynta ka Sawmer.
Kane ka jingjop kaba ar ka la pynlong ïa ka Mawlai ban lamkhmat da kaba kamai 7 point, wat la ka dang sah sa saw tylli ki jingïakhun kynthup ïa ka Shillong Lajong FC bad ka Rangdajied United FC, kiba la kamai mar 6 point.
Tang mar ïasdang ka jingïalehkai ka Sawmer ka la ïoh ban pynkhih jar nyngkong eh ha ka minit kaba 10 lyngba u Diego na ka daw ka jingbym lah ban ïa shan ki rangïalehkai ‘dien ka Mawlai.
Hynrei tang hadien katto katne por ka Mawlai ka la lah ban pynphai kylla ar kol lyngba u Donlad Diengdoh ha ka minit kaba 22 & 24. Hadien shiteng kynta kane ka kynhun ka la thep biang ïa ka kol kaba lai lyngba u Robert Khongriah (34) na ka bynta ban tam da 3-1 kol ha ka kylla step.
Hadien ba la bteng ïa ka jingïakhun jng ka kylla miet u Donlad u la khur syndon ïa ka hat-trick hadien ba u la ïoh ban thep ïa ka kol kaba lai ha ka minit kaba 57. Ka Mawlai ka la nang ïoh bor ha ka rukom ïalehkai namar ka la ïoh ban thep biang sa lai kol lyngba u Fairming Suting (74), Kevin Rymbai (75) bad u Dajiedlang Wanshnong (86). Kham ha shwa ban wai artad ka jingïalehkai, ka Sawmer ka la lah ban pynphai kylla sa shi kol lyngba u Mark Austin (88) shwa ban kan mad ïa ka jingshah kaba lai ha kane ka lympung.
Ka jingïalehkai ha ka sngi Ba-ar kan long hapdeng ka Nangkiew Irat SC pyrshah ïa ka Langsning ha ka por 3 baje janmiet.
