Nongstoiñ, Ïaïong 01
Palat 60 tylli ki ïing ha ka thaiñ Ri Muliang ki la shah pynjulor bad shah lied ka tnum ha ka ‘erïong kaba la wan lynshop kyndit-kynsan ha ka janmiet jong ka 31 tarik u Lber mynta u snem.
Katkum ka tyllong khubor la ïathuh ba katei ka ‘erïong ka la wan ha ryngkat bad u slap, bad katto-katne ki shnong kiba la ngat ha katei ka apot ki kynthup ïa ka Langpih, Tynghor, Umyiap bad kiwei kiwei ki shnong jong katei ka thaiñ.
Nalor kata, la ong ruh ba ka ‘erïong ka la pynkyllon ruh ïa ki ‘post light’ bad la don ruh kumba katto-katne ngut ki briew kiba la mynsaw.
U samla Distarbor Wanñiang, President HYC Ri Mulliang Pyllun u la ong, haduh mynta ym pat lah ban ai jingkheiñ kaba kham bniah hynrei la shu antad ba tang ha ka shnong Tynghor ruh ym duna shuh ïa ki 15 tylli ki ïing kiba la shah pynjulor. Na ka liang u sordar ka shnong Langpih u Bah Dominik Wahlang, u la ong ba hapoh ka shnong ki don kumba 14 tylli ki ïing kiba la shah pynjulor na ka jingwan syllad ka ‘erïong, katba bun pat ki jingthung jingtep, ki dieng soh bad kiwei kiwei ki la julor hi khait.
Nangta, ha ka shnong Umyiap pat la ong ba ki don kumba 35 tylli ki ïing kiba la julor bad ki la don ruh kumba saw ngut ki briew kiba la mynsaw malu-mala.
