Shillong, Ïaïong 01
Ka khlur nongrah nar ka ri kaba la khur ïa ka takma rupa ha ka Tokyo Olympics, ka Mirabai Chanu kan pynkhreh ban rung sha ka lympung ïalehkai ka ban long ha Paris mynta u snem hadien ba ka la wan ha ka kyrdan balai jong ka jingkhia kaba 49kg ki kynthei ha ka Group B kaba la long ha ka Lah Sngi U Blei ha IWF World Cup.
Hadien ba ka la wanphai na ka jingmynsaw kaba la neh haduh hynriew bnai, ka Chanu ka la lah ban ban rah ïa ka jingkhia kaba 184kg (81kg+103kg) ha kane ka lympung, kaba long kaba khatduh ban ïoh rung sha ka Paris Olympics.
Ka Chanu ka la lah ban pyndep ïa baroh ki jingdonkam na ka bynta ka Paris Olympics, kaba long ka jingïashim bynta ha ki ar tylli ki lympung kiba kongsan bad lai tylli ki qualifier.
Kumta kane ka lahduh jong u snem 2017 ha ka pyrthei, ka la don ha ka kyrdan ba-ar ha ka jingkhia kaba 49kg ki kynthei jong ka Olympic Qualification Ranking (OQR), kata hadien ïa ka nongrah nar na China ka Jian HuiHua.
Ka jingpynbna kaba kham kongsan na ka bynta kane ka jingïoh rung kan long hadien kaba kut jong ka World Cup ha kaba ïa ka OQR yn sa buh beit buh ryntih. Haduh shiphew ngut ki nongrah nar na kawei pa kawei ka kyrdan jingkhia kin ïoh rung sha ka Paris Olympics.
Ka Chanu kaba la ïashim bynta khatduh eh ha ka Asian Games ha u Nailur ka la ngat ha ka jingmynsaw, ha kaba nyngkong kam shym la lah ban ïalehkai bha, hynrei ka la lah pat ba rah haduh san sien.
Kane ka khlur ïalehkai kaba dang 29 snem ka rta na Manipur, ka la lah ban kynjut ïa ka jingkhia kaba 88kg, katba ka la lah ban rah ïa ka jingkhia kaba 119kg ha ka clean & jerk ha ka Asian Championships kaba la long ha 2021.
Namar kata, ka Chanu ka la long tang marwei napdeng ki nongrah nar jong ka ri ban ïoh rung sha ka Paris Games, ka ban long ka sien kaba lai ba kan ïashim bynta ha ka Olympics.
