Shillong, Ïaïong 02
U MDC ka UDP na Sohra bad President ka UDP East Khasi Hills District, u la ong ïa u President ka Voice of the People Party (VPP) Bah Ardent M Basaïawmoit balei ban thut ne wit ïa ki MLA ka HSPDP.
Haba ïalap ïa ka ilekshon MP ha Tyrsad, kaba hap ha Mawphlang konstitwensi ha ka 2 tarik Ïaïong, u Bah Titos u la ong ba ki 2 ngut ki MLA HSPDP ki khlem jah hynrei ki donlang ban mynjur ban ïatreilang ha ka Regional Democratic Alliance hapdeng ka seng UDP bad HSPDP.
Kane ka jingjubab u Bah Titos ka dei namar u Bah Ardent Basaïawmoit kum President ka VPP haba u ai jingkren ha Mairang, u la ong ba ki MLA ka HSPDP kim shym la mih ha kane ka ilekshon na bynta u kyrtong ka UDP haba ki ïatreilang ha ka RDA.
Ha kane ka jingïalap ilekshon ïa u kyrtong ka UDP, Bah Robertjune Kharjahrin la ïoh jingkren na u MLA ka Mawphlang, Bah Beyondstar Kurbah, Bah Nujorki Sungoh, Bah Rangshap Kurbah, Bah Panbor Ryntathiang General Secretary ka HSPDP bad Bah Starfing Pdahkasiej.
U Bah Titos u la ong ba ym don u briew ban kam ïalade ba dei uba khuid namar ym don uba khuid ha ka pyrthei, hynrei dei ban trei ban shakri ïa kaba bha.
U la pynkynmaw ba ka seng UDP kaba la mih hadien ka APHL bad HSPDP ki la trei bynta ban pynïoh ïa ka jylla, kum ki longdien ym dei ban klet ïa ki.
U la ong ruh ba u Bah Robertjune u dei u muktiar, u dei u nongai jingmut ïa ka Khasi Hills Autonomous District Council (KHADC) bad ha ka por ba u long CEM ma u pat la lah ban ïoh jingmynjur san tylli ki aiñ rew (bill) hapoh lai snem.
U General Secretary ka HSPDP Sengkmie, Bah Panbor Ryntathiang u la ong ba u Bah Ardent Basaïawmoit uba dei u President ba mynta jong ka Voice of the People Party um don ka jingïaineh ne jingïaishah namar u bat ïa ka shuki President ha ka seng HSPDP tang ar snem duna.
U Bah Panbor u la ther tyngeh ïa u Bah Ardent mar shu mih na ka seng HSPDP namar u la kynnoh ba kane ka seng kam don nongrim shuh. Dei na kata ka daw u la pynshai ïa ki paidbah ba kim dei ban sngap ïa ka nia jong u Bah Ardent namar haduh mynta dei tang ka seng HSPDP bad UDP kiba dei ki seng ‘riewlum kiba dang don haduh mynta.
