Ka jingpynkhreh na ka bynta ka jingthep ‘vote’ banyngkong ka ban long ha ka 19 tarik Ïaïong, 2024, ka la nang ïaid shakhmat. Ki kyrtong ki ban ïakhun ym tang ha Meghalaya, hynrei wat ha kiwei pat ki bynta jong ka Ri, ki la bunkam ban leit kylleng sawdong ban ïakynduh, ïakren bad khroh ïa ki nongthep ‘vote’. Kam dei kaba suk ban leit kylleng khamtam ha ki konstitwensi kiba heh bad ba bun paid. Kane ka ilekshon kan long haduh hynñiew bynta bad kan sdang naduh ka 19 tarik Ïaïong bad kan kut ha ka 1 tarik Jylliew katba ka jingpynbna ïa ki nongjop kan long ha ka 4 tarik Jylliew. Ha kane ka ilekshon, ki don haduh 96.8 klur ngut ki nongthep ‘vote’ ki ban jied ïa ki 543 ngut ki MP ha ka Ri baroh kawei katba ïa ka jop ka rem jong ki kyrtong yn tip ha ka 4 tarik Jylliew.
Ha ka bynta banyngkong jong ka ilekshon, kata, ha ka 19 tarik Ïaïong, ka jingthep ‘vote’ kan long ha ki 102 tylli ki Lok Sabha konstitwensi, ha ka bynta kaba ar, ka jingthep ‘vote’ kan long ha ka 26 tarik Ïaïong ha ki 89 tylli ki konstitwensi, ha ka bynta kaba lai, ka jingthep ‘vote’ kan long ha ka 7 tarik Jymmang ha ki 94 tylli ki konstitwensi, ha ka bynta kaba saw, ka jingthep ‘vote’ kan long ha ka 13 tarik Jymmang ha ki 96 tylli ki konstitwensi. Ha ka bynta kaba san, ka jingthep ‘vote’ kan long ha ka 20 tarik Jymmang ha ki 49 tylli ki konstitwensi, ha ka bynta ba hynriew, ka jingthep ‘vote’ kan long ha ka 25 tarik Jymmang ha ki 57 tylli ki konstitwensi bad ha ka bynta ba hynñiew, ka jingthep ‘vote’ kan long ha ka 1 tarik Jylliew ha ki 57 tylli ki konstitwensi.
Ka Election Commission jong ka Ri India (ECI) ka la pynbna ba ki nongthep ‘vote’ ha ki 543 tylli ki konstitwensi ki don haduh 96.8 klur katba ha u snem 2019 ki la don 89.6 klur. Kane ka pyni ba hapoh san snem, ka jingdon ki nongthep ‘vote’ ka la kiew da 7.28 klur. Shuh shuh ki don haduh 1.84 klur ngut ki nongthep ‘vote’ ha ka rta ba hapdeng 18-19 snem katba ki ‘Third Gender’ ki don 48,044 ngut. Hadien ba ka Parliament ka la pynkylla ïa ka Representation of the People Act, 1950, ban ailad ïa ki nong India kiba shong sa sah shabar ri ba kin thep ‘vote’, kiba la pynrung kyrteng ki don 1,18,439 ngut. Nalorkata, ki don 88,35,449 ngut ki nongthep ‘vote’ kiba don jingduna ha ki dkhot met bad haduh ka 10 tarik Lber, 2024, ki don 81,87,999 ngut ki nongthep ‘vote’ kiba la palat 85 snem ka rta bad 2,18,442 ngut kiba la palat 100 snem ha ka rta.
Ha kane ka ilekshon, ki don ki arliang mamla kiba kham khlaiñ ha ka jingïakhun bad kita ki kynthup ïa ka National Democratic Alliance (NDA) ba la ïalam da ka Bharatiya Janata Party (BJP) bad ka INDIA lane ka ‘Indian National Developmental Inclusive Alliance’. Kane ka kynhun INDIA ka don palat 30 tylli ki seng saiñpyrthei bad kiba pyrshah ïa ka BJP. Ha kiba bun ki konstitwensi, ka jingïakhun kan long beit hapdeng ki kyrtong ka NDA/BJP bad ki seng kiba don hapoh ka INDIA. Ki don kiba kwah ba ka BJP kan ïalam biang ïa ka sorkar ha ka sien kaba lai hapoh ka jingpeit jingkhmih jong u Narendra Modi kum u Myntri Rangbahduh, bad don ruh kiba kwah ïohi ïa ka jingkylla da kaba khmih lynti ba ka kynhun INDIA kan wan ha ka bor. Kaba kumno ka jingangnud kan wan urlong yn sa tip ha ka 4 tarik Jylliew ynda la ñiew ïa ki ‘vote’.
Ha Meghalaya, ka jingdon ki nongthep ‘vote’ ka la kiew da 55,971 ngut ha ka shi snem, kata, hapdeng u snem 2023 bad u snem 2024. Ka jingdon ki nongthep ‘vote’ baroh, kata, shynrang, kynthei bad ki ‘Third Gender’ ka long 22,17,100 ngut. Ki kyrtong ki don haduh 10 ngut, kata, hynriew ngut na Shillong Parliamentary Constituency bad saw ngut na Tura Parliamentary Constituency. U MP ba mynta, u Bah Vincent H Pala, u la long MP la 15 snem, bad kane ka dei ka sien kaba saw ba u ïakhun. Hangne, ki don kiba kwah jingkylla bad don ki bym kwah. Tang ka por kan sa batai mano kita ki ban jop – kiba kwah jingkylla lane kiba kwah ïa ka jingneh.
