Ha ka jingïohi jongnga kiba bun ki paidbah Khasi – Pnar kim da nang bha ban kren phareng hapoh ri Khasi jong-ngi. Lehse dei tang ka seng VPP kaba nang phareng bha namar ngi ïohi ba ki ïeng pyrshah ïa u Lat ba u kren da ka ktien Hindi ki nong India. La katta ruh haba peit pat ha ki dong ki lad ba ki shnong ki thaw khamtam hangne hapoh ka area ka sor Shillong, phin ïohi ba kim ju kham thoh Khasi ha ki sign board. Bun phin iohi ba ki thoh da ka phareng kum, No Parking Zone, No Parking Infront of the Gate, No Overnight Par-king, No Entry, Beware of Dogs, bad bun kiwei kiwei ki jait jingthoh sign board da ka ktien phareng. Kane keiñ ka sakhi shai ba ki Khasi – Pnar ki nang bha ban kren phareng tiak-tiak. Ne ka dei tang ka jingsngew khyllew bad sngew stad ba ngi nang ban kren phareng ngim salia bad ngim donkam shuh ïa ka ktien Khasi la jong. Ha ka jingshisha ha ki shnong ki thaw la dei ban thoh beit da ka ktien lajong kata ka ktien Khasi, ym dei ban thoh da ka ktien phareng haba buh jingmana ha ki shnong ki thaw. Kane ka long ka jingiohi jongnga khnang ba ka ktien Khasi kan kiew irat bad nang roi hapoh ka Jylla.
C. B. Iawphniaw
