Shillong, Ïaïong:
Ka samla Alicia Bakor Phanwar, 26 snem ka rta, ka la wanrah burom ïa ka jylla namar ka la ïoh ban rah ïa ka khusnam ‘ENBA Gold Award’ kum ka ‘Best News Producer’ ha ka ktien ‘English’ ha ka Exchange4media News Broadcasting Awards (ENBA) kaba la long ha Imperial Hotel ha New Delhi ha ka 30 tarik Lber.
Kane ka khusnam ka dei na ka bynta ban ai jingithuh ïa ki shlem ai khubor bad ki nongpathai bad nongpynmih khubor kiba tbit tam hapoh India.
Ha ka rta kaba 26 snem, ka samla Alicia ka la long kum ka nongkhmih bad pynïaid hapoh ka shlem ai khubor kaba la paw ha ri India, kata, ka ‘India Today’. Nalorkata, ka la long ruh kum ka nongpynmih ïa ka ‘marquee show’ kaba la tip kum ka “News Today at 9” bad u Rajdeep Sardesai ha kaba ka la jop ïa ka ‘ENBA Gold Award’.
Ka la long ruh kum ka nongpynmih khubor na ka bynta ka Mission 2024 bad ka Preeti Choudhury ha kaba ka la ïoh ïa ka khusnam kum kaba sted tam ban pynmih ïa katei ka ‘show’.
Kane ka samla ka la trei ruh bad u Arnab Goswami ha ka Republic TV bad ha CNN-News18.
