Shillong, Ïaïong 02
U Symbud Myntri Rangbah ka Jylla, Bah Prestone Tynsong uba khmih ruh ïa ka tnat Kam Pohïing, ha ka Sngi Ba-ar u la ong ba ka jingkhang ïakren ïasuk ka dang plie bad mynta ka shong ha ka seng kieng atiar ka Hynñiewtrep National Liberation Council (HNLC) ba kan shim ïa ka rai.
“Na ka liang jong ka Sorkar ngi dang plie ka jingkhang bad khot ïa ka HNLC ba kan wanphai biang sha ka miej ïakren ïasuk,” la ong u Bah Prestone haba kren sha ki lad pathai khubor ha ka Sngi Ba-ar.
“Ngan nym lah ban batai lut ne kren eiei halor kane, ka aiñ ka don bad ka jingtohkit ka dang ïaid, ki pulit ruh ki dang trei shitom bad ngin pynthikna ba ka shongsuk shongsaiñ kan neh,” u la ong.
“Ngi dang khot ïa ki ban wan sha ka miej ïakren, naba phi la dep ban sdang bad lada long kaba lah, pyrkhat biang sa shisien halor ka rai kaba phi la shim, bad lada ki sngew ba kam donkam shuh, nga ong biang ha phi ba ka lynti jong ka aiñ kan treikam,” la ong u Bah Prestone.
Ha kaba ïadei bad ka jingjia pynbthei bom IED da ka HNLC dang shen, u Symbud Myntri Rangbah u la ong ba ka jingtohkit ïa kane ka kam ka dang ïaid shakhmat.
