Tehran, ïaïong:
Ka Israel ha ka Sngi Nyngkong ka la ther bom sha ka tnat ba dei khmih ia ki nong Iran hapoh Syria, ha kaba 7 ngut ki dkhot jong katei ka tnat na Iran ki la ïap.
Ka Israel kam shym la pynphai ktien eiei halor kane ka khubor hynrei ki heh ka Iran ki la maham tyngeh ia ka jingiakynad kaba lah ban heh hapdeng ka Israel bad ka Iran tang namar ka thma jong ka Israel hapoh Gaza.
Ka tnat Islamic Revolutionary Guard Corps jong ka Iran ka la jer kyrteng ia u Brigadier General Mohammad Reza Zahedi bad kiwei 6 ngut ki heh kiba la duh noh la ka jingim na katei ka jingleit ther bom ka Israel sha katei ka jaka.
La ong ba kawei ka tnat na Britain ruh kaba dei khmih ia ka tnat Human Rights jong ka Syria ka la iathuh ba ki don kumba 11 ngut kiba la khlad ha katei ka jingjia, kynthup ia ki dkhot katei ka tnat na Iran kiba la duh ei ia ka jingim na katei ka jingleit thombor jong ka Israel.
Kumta kitei kiba khlad ki kynthup ia 8 ngut ki nong Iran, 2 ngut ki nong Syria bad uwei u nong Lebanon. Kine baroh ki dei dkhot treikam jong ki tnat bapher-bapher bad kim dei ki ‘riew paidbah.
Katba u nongrah ktien jong ka Iran sha Syria, u la pynbna ia ka jingdon kiba khlad bad ong ba ki don tang 5 ngut kiba khlad bad shah ktah ha katei ka jing-leit ther bom ki liengsuiñ F-35 jong ka Israel kaba la ther haduh 6 tylli ki ‘namding sha katei ka jaka ha katei ka por.
Nalor kata, la ong ba ki bor pahara ki la leit ban pynjur ka jingpahara ha katei ka thaiñ baroh kawei tang mar ia bna ia katei ka khubor bad ka jingleit thombor jong ki shipai ka Israel sha Syria.
Ka tnat iada jong ka Syria ruh ka la iathuh ba katei ka jingleit ther bom jong ki liengsuiñ ka Israel ka la pynjulor bad pynum syndon ia katei ka ïing mala baroh kawei bad kaba la ktah bad pynmynsaw ia baroh kat kiba don ha katei ka jaka treikam.
