Washington, ïaïong:
Katkum ki khubor, la iathuh ba katto-katne ngut ki dkhot jong ka tnat World Central Kitchen na US kaba ju sam mar bam sha ki paidbah ha Gaza, ki la duh noh ia ka jingim na ka jingther bom jong ki shipai Israel sha Gaza Strip ha ka Sngi Nyngkong.
La ong ba ka tnat World Central Kitchen ha katei ka sngi ka la pynbna da kaba ong ba ka la duh noh ia katto katne ngut ki hynmen bad para kynthei-shynrang na ka jingleit thombor jong ki liengsuiñ ka Israel sha Gaza bad kumta ruh na ka liang jong katei ka tnat, ka la phah ia ka khubor sngewlem sha ka iing ka sem jong kitei kiba khlad baroh bad kiba la ïadon bynta ha ka jingiakhun bad len lade naka bynta ka bha ka miat jong u paid nongshong shnong ba lui-lui ha Gaza.
Ki heh ka Hamas kiba dei khmih ha katei ka jaka, ki la pyntip ba kitei kiba khlad ki kynthup ia ki nong Britain, Australia bad don ruh kiba dei na Poland, ha kaba ia uwei pat uba khlad ym pat lah ban pynithuh ba u dei u nongshong shnong jong kano-kano ruh ka ri. Katba sa uwei pat uba la khlad lang ha katei ka jingjia u dei u nong Palestine hi uba ju long tang u nongñiah kali ban kit ia kitei ki nongtrei na katei ka tnat.
