Shillong, Ïaïong 02
U Symbud Myntri Rangbah ka Jylla, Bah Prestone Tynsong uba khmih ruh ïa ka tnat Kam Pohïing, ha ka Sngi Ba-ar u la kyntu ïa ki seng trai jylla ne bar jylla, ba kim dei ban leh ïa kino-kino ki kam palat pud namar ka aiñ kan ym map satia ïano-ïano ruh kiba donkti ha ka jingpynïap ïa ar ngut ki nongbylla bar jylla ha Ichamati, East Khasi Hills.
Haba kren sha ki lad pathai khubor, u Bah Prestone u la ong, “Hooid ki pulit ki la rah ïa ar ngut ki briew bad ngan nym ïathuh lut baroh, naba ka jingtohkit ka dang ïaid shakhmat, bad ngin ïai ap shipor tad haduh ban da poi sha kaba kut, ha kaba ngin sa lah ban ïathuh kaei kaba jia.”
U Bah Prestone u la ong, “Ka khubor ka long kaba shai bha la ka dei ïa ki seng napoh ka jylla ne ki seng jong ki bar jylla, ba ka jingkyrpad jong nga sha baroh ka long ba wat leh ïa kino-kino ki kam palat pud. Sngewbha ban nym jam palat ïa u pud, ai ba ka aiñ kan ïeng bad ka aiñ kan ym map ïano-ïano ruh kiba donkti.”
“Nga kwah ban kyrpad bad kyntu ïa baroh ban kiar na kum kine ki jingjia, kaba pynsngewsih ïa baroh. Kumta nga kwah ban kyrpad ïa baroh ba ka aiñ ka long halor ïa baroh bad na ka liang ka Sorkar ngin pyntikna ba ka aiñ kan ïaid ha la ka jong ka lynti,” u la ong.
Haba kylli halor ka jinglong ka shongsuk shongsaiñ, u Bah Prestone u la ong, “Peit shane, ka jingtynjuh kan don beit hynrei ngi la pynkhreh ïa ka. Lada mih ki jingkulmar, ngi don ma ngi, ngi lah ban tehlakam bad kumta nga ong, ka jingkyrpad jong nga hi ka long tang katne, ba kino-kino ki seng kim dei ban theh umphniang ïa kane ka jingjia namar dang shen nga la ïohi ïa ki jingai khubor, kaba nga lah ban ong ba ka long ka khubor thok ba ki kwah ban leh kane katai, kaba lah ban nang aiding shuh shuh”.
“Kumjuh ruh nga maham ïa baroh ba kim dei ban ïaid palat ïa u pud ba la buh da ka aiñ namar la pynïaid ïa ngi da ka aiñ ka kanun,” la ong u Bah Prestone.
