Bengaluru, ïaïong:
Ha shwa ban don ka ilekshon Lok Sabha, u Myntri Rangbah jong ka jylla Karnataka u Siddaramaiah u la buh ka jingkyrpad ïa ki nongthep vote jong ka Varuna Assembly konstiwensi ba kin pyntikna ban ai ka jingkyrshan bad kyntiew ïa ka jylla da kaba ai ka jingkyrshan ïa u kyrtong jong ka seng Congress ban pynjop bad pyntam da kumba 60,000 vote ha ka ilekshon Lok Sabha ka ban sa wan.
“Ha u snem 2019 ha ka jingïakhun ïa ka ilekshon Lok Sabha, u Dhruvanarayan uba long u kyrtong jong ka seng Congress u la shah rem tang 1,817 vote….Ha kane ka por kaba mynta da ka jingïaryntih lang ha ka ilekshon Assembly phi la lah ban pynjop ïa nga da 48,000 vote ha Varuna. Hato phi lah ban ai kumjuh ne kham palat mynta? U kyrtong jong ngi u la dei ban jop bad tam da kumba 60,000 vote,” la ong u Siddaramaiah.
Ha ka jingai jingkren ha ka jingïalang paidbah kaba la long ha Varuna, u la ong: “Ha Varuna phi la ithuh ïa nga, kumjuh ïa u HC Mahadevappa (Minister). Nga long u nongmihkhmat jong phi, u khun jong nga u Yathindra u la long u MLA barim na Varuna. Haba ngi la don hangtei, ka la dei ban lah ban pyntam da kumba 60,000 ki vote.”
“Lada phi lah ban pynjop ïa u kyrtong jong ka seng Congress bad pyntam da 60,000 vote, Ngan sa kmen shi katdei eh. Yn ym don shuh mano manor uh ki ban ktah ïa nga. Hato ngan sah kum u Myntri Rangbah ne em? Kumta nga kyrpad rit ïa phi…Ngan sa wan biang ban ai khublei sngewnguh ïa phi hadien ka jingjop,” u la ong.
Ka Varuna Assembly konstitwensi jong u Siddaramaiah ka hap hapoh ka Chamarajanagar Lok Sabha konstitwensi, ha kaba u khun jong u Mahadevappa u Sunil Bose, u la ïakhun kum u kyrtong jong ka seng Congress.
