Mawkyrwat, Ïaïong 02
Ki paidbah nongleit ïew leit hat ha ka step jong ka 2 tarik u Ïaïong 2024 ki la lap ïa ka metïap jong uwei u briew hajan kawei ka pyntha kba ha Riat Thawlong, Mawkyrwat ka lynti ïaid kjat na Mawkyrwat sha Marshillong.
Ïa utei u briew la tip kyrteng kum u Pynskhemlang Lyngkhoi ba dang 27 snem ka rta na ka shnong Nongbah Marshillong ha South West Khasi Hills.
Katkum ka jingïathuh ki bahaïing, la ong ba u Pynskhemlang Lyngkhoi u dei uba la don lok don khun bad u la leit sah sha Mawkyrwat naduh ka Sngi U Blei ka 31 tarik. Dei tad haduh ka miet jong ka 1 tarik u Ïaïong 2024 kaba dei ka Lah Sngi U Blei haba ki bahaïing ki la pyrshang ban ‘phone’, hynrei une u rangbah u khlem shim shuh ïa ka ‘phone’.
Ïa ka metïap jong utei u samla rangbah la lap nyngkong eh da uwei u samla na Marshillong ha kaba u la pyntip noh wut-wut sha ki bahaïing.
Shuh shuh na ka liang ki bahaïing ha kaba ïadei bad katei ka jingjia, ki la suba jur ba u Pynskhemlang Lyngkhoi u la shah pynïap namar ka jingdon jong ki dak mong ha ka bynta jong u ryndang ka kti bad kumjuh ruh ki dak jngem.
Ïa ka metïap la pynkit noh sha CHC Mawkyrwat na ka bynta ban pyndep ïa ka ‘postmortem’ bad halor katei ka jingjia, ka jingtohkit jong ki pulit mynta ka dang ïaid shakhmat.
