Jerusalem, ïaïong:
Katkum ki khubor, la iathuh ba uwei u rangbah u la shah dung tari bad 3 ngut kiwei pat ki la mynsaw ha katei ka jingjia kaba la jia ha ka Sngi U Blei ha ka jaka iadie- iathied ‘Shopping Mall’ kaba don hajan ka shnong Ashdod jong ka Israel.
U Lamphang jong ka tnat pulit Israel u la iathuh ba dei u lehnoh uba la leh ia katei ka kam thombor kaba la buh jingma ia ki paidbah nongleit-nongwan ha katei ka sngi ha shwa ba un shah kem bad shah siat noh ha ki pulit kiba ap pahara ha katei ka jaka. Hynrei ki pulit kim shym la pynshai la ki la shu kem ne ki la ioh siat iap syndon ia utei u lehnoh ha katei ka jingjia.
Kane ka la jia hapoh kawei ka jaka iew kaba don ha Gan Yavne, ka distrik kaba mar syndait bad ka shnong Ashdod.
Ki pulit ki la iathuh ba utei u suba lehnoh uba don kti ha katei ka jingjia la antad ba un dang don ha ki rta ba 19 snem bad u dei ruh na Hebron jong ka West Bank.
Ki la don ruh katto katne tylli kum kitei ki jingjia thombor ha ki jaka paidbah hapoh Israel ha kine ki taiew ba la leit, kynthup ia kawei kaba la jia ha ka Sngi U Blei jong ka taiew ba la lah, ha kaba ka la don ka jingjia dung tari ha ka jaka ïeng bos ha ka phang South jong ka nongbah Beersheva.
Hynrei la ong ba kine ki jingjia thombor kiba wan jia ha Israel ha kine ki sngi, ki long ruh naduh ba ka Israel ka la leit ban kput ia ki lehnoh Hamas hapoh ka nongbah Gaza jong ka Palestine namar ka jingleh jong ki lehnoh Hamas ha ka 7 tarik u Risaw jong u snem 2023.
Bad la ong ruh ba ka jingleit hiar thma jong ka Israel sha Gaza ka la shim ia ka jingim jong palat 23,782 tam ki riew paidbah nongshong shnong ka Gaza bad kham bun ki dei ki longkmie bad ki khyllung- khynnah, kumba la pyntip da ka tnat ka koit ka khiah jong ka Gaza.
