Shillong, Ïaïong 02
U President ka National People’s Party (NPP) Meghalaya, Bah Prestone Tynsong, ha ka Sngi Ba-ar u la ong ba ka NPP ka la don ka jingtikna ba kan ïoh beit ïa ka jingjop ha kane ka ilekshon MP na Shillong bad Tura Parliamentary Konstitwensi.
Haba kren sha ki lad pathai khubor, u Bah Prestone uba dei ruh u Symbud Myntri Rangbah ka jylla, u la ong ba ka ilekshon hi ka dei ka ilekshon bad kumta baroh ki nongïakhun ki long kiba khlaiñ bad kiba buh jingma ïwei-ïa-iwei.
Haba kylli, u Bah Prestone u la ong, ha kane ka kynti ki don haduh 6 ngut ki kyrtong na Shillong bad kumta ka jingma hi ka long beit na baroh ki nongïaleh pyrshah.
“Ngam ong ba ka jingma ka dei ka VPP ne kiwei kiwei ki seng saiñ pyrthei, ka jingma ka long ïa baroh ki kyrtong, namar baroh ki dei kiba khlaiñ”, u la ong bad bynrap ba na ka liang ki nongïalam bad nongkitkam ka NPP ki la trei shitom ban pyntikna ïa ka jingjop jong ka kyrtong ka seng ka Kong Ampareen Lyngdoh.
“Ngi sngewthuh ba kumno ngi trei, naba kane ka ilekshon MP ba mynta, ngi la shim ïa ka kum kawei na ki ilekshon kaba donkam bha kumba long ka ilekshon MLA bad MDC, ha kaba ngi la trei shitom bad ngi la poi sha man la ki shnong ki thaw ki kyndong-kynshrot ym tang ha ki 36 tylli ki konstitwensi hynrei ha baroh 60 tylli ki konstitwensi,” u la ong.
Shuh shuh u la ong ba kum ka seng ki don ka jingkyrmen bad tikna ban jop ha kane ka ilekshon namar ka jingwan pynïasoh jong ki nongïalam bad nongkyrshan na kiwei kiwei ki seng, ha kaba u la pynpaw ruh ba bun ki briew ki la wan ïasoh sha ka NPP shuwa ka ilekshon. “Ngi dang shu wan phai na Jowai ha kaba bun ngut ki nongïalam ki la wan ban ïasoh bad ngi bad ym tang ha Jowai wat ha nongbah Shillong, u Working President ka NPP ruh u la pdiang ïa ki nongïalam bad nongkyrshan na kiwei ki seng kiba bun sha ka NPP,” la ong u Bah Prestone.
