Shillong, Ïaïong 02
Ki bahaïing hasem jong 2 ngut ki dkhot ka KSU kiba la shah kem ha ka miet Lah Sngi U Blei ki la pynpaw ka jinglyngngoh halor ka jingwan kem jong ki pulit ïa kitei 2 ngut ha ka por shiteng synñia.
Ka jingkem ïa kitei 2 ngut ba kynthup ïa u Mesadapbor Skhembil bad u Shanborlang Shati, kiba dei ruh ki dkhot ka Khasi Students’ Union (KSU) South Khasi Hills District Unit ka long halor ka jingsuba donkti ha ka jingjia kaba dang shen ha Ichamati.
“Nga ha ka jingtieng, u don keiñ ha ïing, nga pat nga ong ym don. Hadien, nga ong ngan plie la ka plie bad u khun jong nga u ong plie beit,” la ong ka kmie jong uwei na kiba shah kem.
Ka la ïathuh ruh ba hadien ba ka la plie, ki pulit ki kem noh ïa u bad haba ka la kylli ïa ka daw, kim shym la ïathuh hynrei ki la phah wan mynstep.
“Ki kwah tip tang ka jingshisha ïa kaba la jia sha Ichamati. Ki ong ba kin ym leh eiei. Ki ong ba yn bat shuwa ynda la dep tohkit. Ngi wan mih namar ngi la tip ba ki la wanrah mynmiet, kum ki bahaïing ngin hap wan mih hi ïa la ki jong ki para,” la ong ka hynmen.
Ka la ïathuh ruh ba ki pulit kim pat pyntikna la kitei 2 ngut ki donkti shisha ne em ha katei ka kam hynrei ki ong ban shu tohkit shuwa.
Hadien kane, ka la ong ba kum ka ïing ki la shong pyrkhat bad ki la leit sha thanat hynrei ki la ïoh jingtip ba la rah noh ïa ki sha Shillong.
“Nga sngewlyngngoh ba ki shu wan shiteng miet shiteng synñia kumba 1 baje tam eiei. Ki ïa wan bun ngut, i Mei lei i ong ngam plie, u para u ong plie beit. Ki ïathuh ba dei ki pulit bad ki phah plie. Kumta ngi la plie,” la ong ka hynmen u Shanborlang.
Ka la ong ruh ba kam don jingtip eiei, hynrei dei tad haduh ba la wan kyrsiew ka kmie bad ki la wan sha thanat.
“U pulit uba na thanat Sohra u la ong ba ym lei-lei bad kim leh eiei tangba shu wan mih beit lashai mynstep bad ngi la wan mih ha thanat mynstep. Ki phah wan noh shane (Shillong),” ka la ong.
Shuh shuh ka la ong ba u para jong ka u dei uba trei bad sah beit ha Ichamati bad u wan ïing shisien shitaïew – tang ha ka Sngi Saitjaiñ.
