Jowai, Ïaïong 02
“Nga pan ïa ki sakhi-satar ne ka kot saiñdur (blueprint) ban pynshisha ïa ka jingieid jong ka VPP ïa ka jaitbynriew, hynrei la ai jubab pynban ba ngim pdiang re ïa phi Maduh Prestone ba phi la rim palat.”
“Hooid, nga la rim, ngam don shñiuh shuh, hynrei ngan kylli ïa phi, phi pat phi thymmai haduh katno?” La kylli u President ka National People’s Party (NPP) bad Symbud Myntri Rangbah, u Bah Prestone Tynsong ïa u President jong ka VPP ha ka jingïalang jong ka NPP kaba la long ha Indoor Hall Ladthadlaboh, Jowai ha ka Sngi Ba-Ar.
“Ngi ïa long MLA lang ha u snem 2008 bad 2013, nga kwah ban tip kaei kaba phi la leh, ai jubab biang mynta,” la ong u Bah Prestone ïa u MLA ka Nongkrem bad u President ka VPP, u Bah Ardent Miller Basaïawmoit.
Haba bteng shuh shuh ïa ka jingkren u Bah Prestone u ong, ba u bna ba ha sor Jowai ruh ki briew ki ïa shongshit ‘Prah’ khlem da pynshong nongrim.
Halor ki jingkynnoh pyrshah ïa ka sorkar Meghalaya Democratic Alliance (MDA) ba ïalam da ka NPP, u Bah Prestone u la ong ym dei ban sngewphylla namar la ïohi ïa ki briew kiba kawang maw ïa ka seng, hynrei wat hapdeng ka jingshah kynnoh, ka NPP ha ka ilekshon MLA ka dang ïoh 19 ngut ki MLA ha u snem 2019 bad 26 ngut ha ka ilekshon ha u snem 2023.
Ha kaba ïadei bad ki kam jong ka sorkar naduh ka MDA-1 bad MDA-2, u Bah Prestone u la ong ba dei tang kane ka sorkar kaba ïalam da ka NPP kaba nud ban ktah ïa ki mat ki jura kiba eh kum ka jingpynbeit pud hapdeng ka Meghalaya-Assam, ka mat Them Metor nalor kiwei bad ka NPP kan ïaid shakhmat wat lada ka shah lynthem maw ban leh ïa kaba bha.
Haba pynkut ïa ka jingkren u la kyntu ïa ki longkmie- longkpa bad ki samla ban mih ryntih ha ka 19 tarik Ïaïong ban pynjop donburom ïa ka Kong Ampareen Lyngdoh namar ka dei ka longkmie kaba la jied kyrpang mynta ka kynti ba kan mihkhmat na ka jaitbynriew Khasi Jaiñtia ban pyniphuh ha ka Dorbar Bah ha Parliament.
