Shillong, Ïaïong 02
“Ka VPP kam dei u tit lyiur ka dei ka seng kaba la mih hadien ba la ïaphylliew jingmut.”
Ïa kitei ki kyntien la kren da u President rangbah ka Voice of the People Party (VPP), u Bah Ardent Miller Basaïawmoit, ha ka Sngi Ba-Ar ha ka jingïalang ïalap ilekshon MP ha ka shnong Sutnga ha East Jaiñtia Hills.
Haba batai shaphang ka rukom seng ïa ka VPP, u Bah Ardent u la ong, “Ngi la ïashong, ngi la ïatai, ngi la ïathir bha, kum kita ki ‘riew rangbah kiba don ka jingkitkhlieh balei ka la pynlong ïa ngi ba ngin ïashong ym tang shisien, ym tang da ki sngi, ym tang da ki bnai, hynrei la palat snem ngi la ïakynduh, ngi la ïashong ngi la ïathir la ïatai, ngi la ïa wad ïa ka lad ka lynti ba ngin weng ïa kane ka jingkah dum kaba don ha ka jingmut jingpyrkhat jong ki paidbah.”
U la ong ba kum ki ‘riew rangbah, ki la ïohi ïa ka dur khmat jong ka jaitbynriew, ka jingkhia kaba ban ïa ka jingmut jingpyrkhat jong ki longkmie ki longkpa, jinglynga-jingpisa kiba don ha ka jaitbynriew.
“Ngi ïohi ïa kata ka jingdukha mynsiem, ngi ïohi ïa kata ka jingsheptieng kaba don ha ki bad ngi ïohi ïa ka jinglip rong ka jong ki khun samla ki jong ngi ha kane ka jaitbynriew,” la ong u Bah Ardent.
Namarkata, u la ong ba kum ki ‘riew rangbah kiba don ïa ka jingkitkhlieh ki la ïohi ba dei tang kawei ka lynti kaba yn leit sha u paidbah, ban tyrwa sha u paidbah bad kata ka long ka synshar ka khadar ka bakhuid.
“Ko ki paidbah kam shym la don ka synshar ka khadar ka bakhuid ha kane ka jylla ka jong ngi, dei namarkata ka jinghiar arsut, dei namarkata ka daw ka don ka jingshah knieh beiñ ïa ki kam ki jam, dei namarkata ka daw la ïoh jingmyntoi jingïarap tang kito kiba don ha syndah jong kito kiba don ha ka bor,” la bynrap u Bah Ardent.
U la ong ruh ba ka don ka jingleh shiliang ha kane ka synshar ka khadar bad hapdeng ki nongshong shnong. “Ngi la ïatip im-im peit-peit, haba shit haba shai ba ïa ki kam sorkar ha ki katto-katne snem la shu ïa thied. Ki briew kiba don ha DSC, ki briew kiba don ha MPSC, la dei ki briew kiba shu thung da ka sorkar. Ha ki DSC ki bun ki dei ki briew kiba don jingïadei lane ki dkhot jong ki seng saiñpyrthei,” u la bynrap.
Namarkata, u Bah Ardent u la ong ba u la dawa ba dei ban weng ïa kiba kum kita ki briew bad ban thung da ki briew ki bym don jingïadei bad kano-kano ka seng saiñpyrthei khnang ba kiba thep kam kin ïoh ïa la ka jong ka hok lada ki dei hok ban ïoh.
“Ko ki paidbah ngi ïohi ïa ka jingleh shiliang khmat, ngi ïohi ïa ka jinghiar arsut ha ka kamai-kajih ka ïoh ka kot, ka don ka jingbym shngaiñ ha kine ki sngi kiba mynta. Namarkata, ngi sngewthuh ba dei tang ka synshar ka khadar ka bakhuid kaba la lah ban weng ïa kane ka jingkah dum na kane ka jingmut jingpyrkhat kaba lah sa shisien ban ai ka jingkyrmen ka jingtngen ban pynsyaid mynsiem biang ïa ka jaitbynriew,” la ong u heh nongïalam ka VPP.
