Itanagar, ïaïong:
Kum ka sakhi ba ka la kwah ban kam trai ïa ka Arunachal Pradesh, ka China ka la pynkylla kyrteng ïa 30 tylli ki jaka kiba don ha ki bynta jong u Line of Actual Control (LAC) ha ka bynta ba shaphang Shatei jong ka jylla hapoh ka ri India.
Ka Chinese Ministry of Civil Affairs, ka la don bynta ban jer kyrteng ïa ki Administrative Divisions, ha kaba la pyllait ha ka thup kaba saw jong ki kyrteng jaka kiba don hapoh Arunachal Pradesh, ha kaba ka Beijing ka la khot Zangnan, katkum ba la paw ha ka kot khubor Hong Kong kaba ju mih man ka sngi.
Ka thup ba la pynkylla kyrteng da ka China ki kynthup ïa 11 tylli ki thaiñ ba shong briew, 12 tylli ki lum, 4 tylli ki wah, kawei ka pung, kawei ka jaka ban kiew sha u lum bad kawei ka madan. Kine kyrteng ki don ha ki dak China, Tibetan bad Pinyin, ki dak Roman ba la buh ha ka ktien Mandarin Chinese. Kane ka tnat ba dei khmih ka la batai shai ruh halor ki pud ki sam bad ka jingïar jong ka jaka.
Ka Beijing ka la pyllait ïa ka thup kyrteng kaba nyngkong jong ki 6 tylli ki kyrteng jaka ha Arunachal Pradesh ha u snem 2017, kaba ar ka la long na ka bynta ki 15 tylli ki kyrteng jong ki jaka kaba la long ha u snem 2021 ha kaba la bud sa kawei pat ka thup kyrteng na ka bynta ki 11 tylli ki jaka ha u snem 2023.
Ka India na ka por sha ka por ka la pyrshah halor ka jingthmu jong ka China ban pynkylla kyrteng ïa ki jaka ba bun kiba hap hapoh ka Arunachal Pradesh, ha kaba ka la pyntikna ba kine ki dei ki bynta jong ki jaka kiba dang hap hapoh ka ri.
