Shillong, Ïaïong 02
Ka Laitjem CC, Hurdles CC (Mawsynram), Nongdawah CC bad ka Cricket Lovers CC ki la jam sha ka semi final ha ka lympung ïalehkai 3rd District League T20 Cricket Tournament 2024 ba la pynïaid da ka East Khasi Hills Cricket Association.
Kine ki kynhun kin pynkhreh ban ïaknieh rung final ha ka 4 tarik mynta u bnai ha Shor-timai Syiem Stadium kaba ha Smit.
Haba phai sha ki jingïakhun (league) kiba la poi sha kaba kut ha ka Sngi Ba-ar, ka Mawryngkneng CC ka la lah ban pynliem noh ïa ka Maw-phlang CC da 17 run. Ka Mawryngkneng kaba la kam trai ban tied nyng-kong, ka la kamai 176 run bad shah pynhap 6 wiket ha ki 20 over. U Apsharailang Mawthoh u la ïoh ban khyrwit 86 run na ki 51 bol. Katba u Banbhalang Nongsiej u la shim 2 wiwket.
Haba wan beh ïa ka thong, ka Mawphlang ka la kamai tang 159 run bad shah pynhap 7 wiket ha ki 20 over. U Mawlynnai Wahlang u la tied 43 run na ki 36 bol. Katba u Guiding Star Kharsati u la shim 2 wiket. Ïa ka nam Player of the Match la khur da u Apsharailang Mawthoh.
Haba phai sha kawei pat ka jingïakhun kaba ar, ka Sohra Combine CC ka la jop da 6 wiket ïa ka Marbisu CC. Ka Marbisu kaba la kam trai ban tied nyngkong, ka la kamai 102 run bad shah pynhap 5 wiket ha ki 20 over. U Shalenbor Kurbah u la tied 31 run na ki 40 bol. Katba u Mangara Diengdoh u la shim 1 wiket.
Haba wan shimti ïa ka pali kaba ar, ka Sohra Combine ka la lah ban kynjoh sha ka thong da kaba kamai 103 run bad shah pynhap 4 wiket ha ki 13.1 over. U Mangara Diengdoh u la tied 39 run na ki 24 bol. Katba u Mansuk Kurbah u la shim 2 wiket. Ïa ka nam Player of the Match la khur da u Jona Lyngdoh Nonglait.
