Jowai, Ïaïong 02
Ka lympung ïalehkai ‘District Cricket League 2024’ ba la pynïaid da ka West Jaiñtia Hills District Cricket Association (WJHDCA) ka la sdang ha ka 1 tarik u Ïaïong ha madan Khliehtyrshi Mini Stadium.
Ïa kane ka lympung la phiah ha ki ar bynta, ka Pool-A bad Pool-B. Ha ka Pool-A ki long ka West Jaiñtia Police CC, Khliehtyrshi CC, Moodymmai CC, Ummulong Sports Club bad Efty United XI SC (Mynso). Katba ha ka Pool-B ki long ka Phramer CC, Lion Sports & Youth Affairs, Mupliang CC, NEAU Cricket Club bad ka Cultural Youth Club Mowkaïaw.
Ha ka sngi sdang jong ka jingïakhun, ka Lion Sports Youth Affairs ka la jop pyrshah ïa ka North East Adventist University Cricket Club da kaba pynkhyllem 8 wiket.
Ïa ka jingkynting pisa la jop da ka North East Adventist University Cricket Club bad ka jied ban tied nyngkong bad ka la lah ban kamai 46 run ha ka 14.2 over bad shah pynkhyllem baroh baroh ki nongtied. U Vicky ula long u nongïalehkai uba la lah ban kamai bun ron eh, ha kaba ula ïoh 16 run na ki 23 bol, katba u Deibormi Rangad jong ka LSYA ula ïoh ban pynkhyllem 4 wiket na ki 3 over, u Maremdor Sutnga bad u Wijan Pohleng ki la ïoh mar 2 wiket na ki 3 over.
Haba phai pat ïa ka run ba la buh ka North East Adventist University Cricket Club, ka LSYA ka la ïoh ban pyndep noh ïa katei ka run tang hapoh 8.4 over da kaba kamai 47 run bad pynkhyllem 2 wiket. Na ka bynta ka LSYA u Nick Dann ula long u nongïalehkai uba la kamai 23 run na ki 28 bol, u Firstbornson Dkhar ula kamai 15 ron na ki 18 bol. U Deibormi Rangad jong ka LSYA ula khur ïa ka nam Man of the Match.
Katba ha ka sngi kaba bud, ka Khliehtyrshi Cric-ket Club ka la pynliem ïa ka Efty United XI Mynso da 3 run. Ïa ka jingkynting pisa la jop da ka Khliehtyrshi Cricket Club kaba la kam trai ban tied nyngkong bad kamai haduh 206 run na ka 35 over bad shah pynhap 9 wiket.
U Mewada Shylla ula lah ban kamai 49 run na ki 29 bol bad u Timmy Ryng-khlem ula lah ban kamai 34 run na ki 41 bol. Katba na ka liang ka Efty United XI kiba la ïoh ban pynhap wiket ki long Sanvert Kurkalang 3 wiket bad u Kitboklang Lyngdoh 2 wiket.
Haba beh ïa ka thong ka Efty United XI ka la lah ban kamai 204 run bad hap baroh ki wiket. U Sanvert Kurkalang ula kamai 35 run na ki 25 bol bad u Reebok Hynniewta 45 run na ki 39 bol. Na ka liang ka Khliehtyrshi kiba ïoh ban pynhap wicket ki long u Demi Dkhar (3 wiket) bad u Heimon Dkhar (2 wiket). Ïa ka nam Man of the Match la ïoh da u Demi Dkhar jong ka Khliehtyrsh Cricket Club.
