Shillong, Ïaïong 02
U Superintendent of Police (SP), East Khasi Hills District, u Rituraj Ravi, u la ong ba ka jingkem ïa ar ngut haba ïadei bad ka jingshah pynïap jong ar ngut ki briew ha Ichamati ka dei katkum ka jinglap ksai bad ïa kine ar ngut kiba shahkem la phah sha along ki pulit na ka bynta hynñiew sngi ban bteng ka jingtohkit.
U SP u la ong ba ki pulit ki la lap ksai lyngba ka jingtohkit bad ïa ki ar ngut la leit rah sha Ïingkashari bad la shah ban phah sha along ki pulit na ka bynta hynñiew sngi ban bteng ka jingtohkit.
Kine ar ngut kiba la shah kem la tip kum u Mesadapbor Skhembil bad Shanborlang Shati kiba dei ruh ki dkhot ka Khasi Students’ Union (KSU) South Khasi Hills District Unit.
Ïa kine ar ngut la kem ha ka miet Lah Sngi U Blei.
U SP u la ong ba dei katkum ka jinglap ksai halor ka jingshah pynïap la kem ïa kitei ar ngut bad ka jingtohkit ka dang bteng haba ïadei bad kane ka jingjia.
Haba kylli halor ka jinglong-jingman hadien ka jingshah kem jong kitei ar ngut, u SP u la ong ba ki pulit ki peitngor ïa ka jinglong-jingman ban pyntikna ba kan nym jia kano-kano kaba pynthut ïa ka suk ka saiñ.
Ki pulit ki la pynkhlaiñ ïa ka jingpahara ha ka Sngi Balang namar ka don ka jingthmu ban leit tur sha Thanat ha Sohra namar ka jingshah kem jong kitei ar ngut ki samla.
Kum ban pynkynmaw, ar ngut ki briew ki la shah pynïap ha thaiñ Ichamati ha ka 27 tarik Lber.
Ka KSU ka la pynlong ïa ka jingïalang ban pyrshah ïa ka aiñ Citizenship Amendment Act ha Ichamati da kaba thang ruh ïa ki kyndon (rules) jong kane ka aiñ bad ha katei kajuh ka sngi ki pulit ki la lap ïa 2 tylli ki met ïap ha ka por janmiet.
