Aizawl, ïaïong:
Ka Mizoram Excise and Narcotics Department ka la ïoh ïa ka jingjop da kaba ïoh kem ïa uwei u briew uba la 32 snem ka rta ïa uba la tip kyrteng kum u Lalmuankima hajan ka State Guest House ha Chaltlang, haba la khmih bniah na u la ïoh ban kurup ïa kumba 11 grams u Heroin.
Kumjuh na ka jingpynlong ïa ka jingtohkit une uba la shahkem u la phla ba u la donkti bad ki lai ngut ki longkmie kiba dei ki nongshong shnong ha Aizawl, Mizoram. Haba la buddien halor kane, ki shipai ïada ri ki la pynlong ïa ka jingleit khynra ha ka por shiteng synñia, ha kaba da kane, la ïoh ban kem ïa ka KC Thangmawii (44) na Zokhawthar kaba don ha Champhai distrik jong ka Mizoram, bad arngut ki nong Myanmar, kiba kynthup ïa ka Lalthanpari (54) bad ka Tluangthanpari (39), ha kaba mynta ki shong shnong ha Aizawl.
Ki heh ka kynhun ki la ïoh ban kurup ïa shibun ki jingdih pynbuaid haba la khmih bniah na ki, kynthup ïa 109 grams u Heroin bad 5.888 kilograms (kaba kynthup ïa 60,000 tylli ki kuli) jong u Methamphetamine. Baroh kine kiba la shahkem ki la shah pynngat hapoh ka Narcotics and Psychotropic Substances Act 1984.
