Shillong, Ïaïong 02
Ha ka khubor na ki pulit ha ka Sngi Ba-Ar, la ïathuh ba uwei u nongshong shnong ka Lower Lumparing, Shillong, u la ujor ba ha ka 21 tarik Lber, 2024, kawei ka kynthei, lyngba ki rynsan ‘Online’, ka la shukor pisa ïa u kaba la kot sha ka T.82,075 da kaba kular ba kan pynïoh kam ïa u.
Ha kawei pat ka jingjia, ki pulit ki la ïathuh ba u Banteiskhem Nongrum u la pyntip sha ki pulit ba ha ka 30 tarik Lber, ki runar ki la leit rung sha ka ïing jong u kaba don ha Umñiuh Nongrim, East Khasi Hills, bad ki la rong ei ïa ka pisa kaba don T.1.1 lak.
Sa ha kawei pat ka jingjia, ka Philomena Sangma ka la ujor ba ha ka miet jong ka 30 tarik Lber, ki runar ki la tuh ïa ka thuk-thuk jong ka (ML-05S-9253) na ka jaka sah (Quarters) jong ki pulit ka Nongthymmai ha Shillong.
Shuh shuh ki pulit ki la pyntip ba u Sylvester Nongspung u la ujor ba ha ka miet jong ka 30 tarik Lber, ki runar ki la tuh ïa ka thuk-thuk jong u (ML-05S-0648) na Jylli Shop Nongthymmai, Shillong.
Ha kawei pat ka jingjia ha ka 30 tarik Lber, ki pulit ki la ong ba katba ki dang peit bniah ïa kawei ka thuk-thuk (AS-19P-5925) ha ka thaiñ Dobasipara, Tura, ki la lap lyngba ka ‘E-Challan App’ ba kata ka thuk-thuk ka dei kaba la shah tuh na Hatigaon, Guwahati.
Nalorkata, ki pulit ki la ong ba u Chingchang Ch Marak, nongpeit jong ka American Telecom Company (ATC), u la ujor ba ha ka 20 tarik Lber ha ka por kumba 7 baje janmiet, la lap ba hynriew tylli ki tiar ki tar kiba ïadei bad u Mobile Tower ki la jah na ka jaka buh Tower ha Aguragre ha West Garo Hills.
