Jowai, Ïaïong:
Ka Lehniam Chad Tyllu ka dei ka lehniam ne ka rukom dustur ba la pynlong ha Raij Mynso shisien shisnem shwa ban sdang ïa ka rep ka riang jong ki khun ka shnong ka raij ha ki hali ki pynthor.
Ha une u snem ïa ka lehniam la pyndep ha ka 1 tarik Ïaïong ha ka jingsakhi lang u President ka Seiñraij Jowai Bah O.H.Toi kum u kongsan, u Bah K. Myrchiang Doloi Elaka Mynso, ki ‘riew rangbah ka niamtre na kiwei ki raij, ki shnong bad ki shakri niam ka Raij Mynso.
Ïa ka jingïalang la pynïaid da u Habhijan War, President Seiñraij Mynso bad la ïoh ka nguh blei nguh syiem na u Bah Miki Situng, ka jingkren kyrpang shaphang ka nongrim jong ka Lehniam Chad Tyllu la pynsngew da u Ma W. Shylla, Adviser Seiñraij Mynsoo.
U Bah O.H. Toi, President Seiñraij Jowai ha ka jingkren kum u kongsan u la ïaroh ïa ki khun ka niamtre hapoh ka shnong Mynso kiba la pynlong ïa kane ka rukom dustur na ki snem sha ki snem kaba pyni ruh ka dak ka sakhi ba ki khun ka niamtre hapoh ka shnong Mynsoo ki dang bat dang ksoh ïa ka jinglong kyrpang ka jaitbynriew.
U Raymon Nartiang kum Pator ka Raij Jowai ha ka jingkren u la ai mynsiem ïa ki khun ka niamtre hapoh ka shnong Mynso ban long kiba ïatylli bad ïatreilang da ka jingïasngewthuh jingmut bad ban long ka nuska ïa kiwei khnang ban neh ban sah ka niam ka rukom ka dustur ka riti pateng la pateng.
