Shillong, Ïaïong 02
Ka All India Football Federation (AIFF) ha ka Sngi Ba-ar ka la shim ïa ka rai ban sospon ïa u Deepak Sharma kum u dkhot ka executive committee tad haduh ban pynbna da kumwei pat.
Kane ka rai ka la wan hadien ka jingshah kynnoh don kti ban ktah kti ïa ki ar ngut ki ‘thei ïalehkai phutbol ha Goa.
Kitei ki ‘thei ïalehkai ki dei kiba mihkhmat ïa ka Khad FC na Himachal Pradesh ha ka second division jong ka lympung ïalehkai Indian Women’s Football League (IWL) bad la ïathuh ba u Sharma, uba la long trai ïa katei ka klob, u la rung jubor ha ka kamra jong ki ‘thei ïalehkai bad ban jrong kti ïa kitei ki kynthei ha ka miet jong ka 28 tarik u Lber.
Kumta ha ka Sngi Saitjaiñ, ka AIFF ka la bthah ïa u Sharma ba un kiar na kino-kino ki lympung ïalehkai tad haduh ban da lah pyndep ïa ki jingtohkit da ka kynhun tohkit halor katei ka jingshah kynnoh jong u.
Kham hashwa u Sharma u la shah kem ha ki pulit ka Goa hadien ba u la shah ujor ha katei ka jylla kaba la ïoh pynlong ïa katei ka lympung. Hadien kata la pyllait noh ïa u hadien ba u la ïoh jamin.
“Ka Executive Commi -ttee jong ka AIFF ka la shim ïa ka rai ban sospon ïa u Deepak Sharma ban ïadon bynta ha kino-kino ki lympung ïalehkai tad haduh ban da pynbna da kumwei,” la pynpaw kat kum ka kyrwoh jong katei ka synjuk ïalehkai ka ri.
Ha shwa ïa kane, ka Emergency Committee jong ka AIFF kaba kynthup ïa u president u Kalyan Chaubey, u Vice-President u N.A Haris bad u Treasurer u Kipa Ajay, ha ka Lah Sngi U Blei ka la ïohpdiang ïa ka jingujor na kitei ki ‘thei ïalehkai phutbol pyrshah ïa u Sharma.
Kumta ha ka jingïalang jong ki dkhot ka AIFF kaba la long ha ka miet Lah Sngi U Blei lem bad u Sharma u la shah khot lang, ki la ai jingmut ïa u ba u dei ban mih noh na ka jingïalang.
Kat kum ka jingujor ryngkat bad ka AIFF, kitei ar ngut ki ‘thei ïalehkai ki la kynnoh ba u Sharma u la wan rung jubor sha ka kamra jong ki hadien ba u la dih buaid bad u la sdang ban jrong kti ïa ki.
Ha kawei pat ka liang u Myntri ka tnat ïalehkai u Anurag Thakur u la kyntu ïa ka AIFF ba ka dei ban shim ïa ka rai kaba kham tyngeh pyrshah ïa utei uba la don kti ha katei ka kam bad ruh ban pynshitom ïa u.
