Shillong, Ïaïong 02
Ka Langsning FC ka la wanphai da ka jingjop ha ka lympung ïalehkai Shillong Premier League 2023-24 hadien ba ka la lah ban pynliem noh ïa ka Nangkiew Irat SC da 4-1 kol ha ka Sngi Ba-ar ha SSA Stadium kaba ha First Ground, Polo.
Kane ka nam jop ka la wan urlong lyngba u Kitboklang Pale uba la ïoh ban thep ar kol na ka bynta ban pynlong ïa katei ka kynhun u Bah Khlaiñ Pyrkhat Syiemlieh ban khur ïa ki lai point.
Wat la ha ki jingïaleh-kai ba la lah ka Langsning ka la shah rem ha ka Shillong Lajong da 3-2 kol bad ha ka Mawlai SC da 1-0 kol, pynban ha kane ka jingïakhun kaba lai ka la lah ban wanphai da ka jingkhlaiñ bor na ka bynta ban ïakhun tyngeh naduh kaba sdang ha kaba ka la ïoh ban pynkhih jar nyngkong eh ha ka minit kaba 7 lyngba u Maxdierdoff Wahlang.
Nangta, ka Langsning ka la ïoh ban thep biang ïa ka kol kaba ar ha ka minit kaba 19 lyngba u Kitbok-lang. Hadien 5 minit une u rangïalehkai shakhmat u la pynbud biang ïa ka kol kaba ar na ka bynta ban tam da 3-0 kol.
Wat la ki rangïalehkai ka Nangkiew Irat ki la pyrshang ban pynphai, hynrei kim shym la lah ban pynurlong haduh kaba kut jong ka kylla step.
Hadien katto-katne por ba la bteng biang ïa ka jingïakhun jong ka kylla miet, baroh ar kynhun ki la pyrshang ban ïakhun tyngeh, hynrei ka Nang-kiew ka la lah ban pynphai kylla shi kol lyngba u Flavius Lalruatkima ha ka minit kaba 64.
Wat la ka Langsning ka la shah thep shi kol, hynrei ka la ïai bteng ban ïakhun tyngeh bad ka la lah ban thep biang sa shi kol lyngba u Ambilstar Sun ha ka minit kaba 73. Haduh kaba kut jong jingïalehkai ka Nangkiew kam shym la lah shuh ban pynphai bad ka la hap ban mad ïa ka jingshah rem kaba ar ha kane ka lympung.
Lyngba kane ka jingjop ka Langsning ka la ïasoh lang bad ka Nongthymmai lem bad ka Nangkiew Irat ban ïa ryng-kat mar 3 point.
Kane ka lympung kan sangeh shwa shipor na ka daw ba ka SSA Stadium kan pynlong ïa ar tylli ki jingïalehkai I-League 2023 -24 ha kine ki sngi ban wan. Kumta kane ka lympung kan bteng biang ha ka 8 tarik ha kaba ka Ryntih SC kan ïakhun pyrshah ïa ka Rangdajied United FC ha ka por 3 baje janmiet.
