Shillong, Ïaïong 02
U Novak Djokovic, uba la bat haduh 24 sien kum u lahduh ha ka Grand Slam, u la bteng ban bat biang ïa ka rekod ha ka ATP Tour.
Ha kane ka taiew, u la lah ban bteng na ka bynta ban bat ïa ka kyrdan ba nyng -kong ha ka pyrthei. Ha ka 9 tarik mynta u bnai 2024, u Djokovic un sa knieh noh ïa ka rekod ba la bat da u Roger Federer bad ban long uba la kham rangbah ban bat ïa ka kyrdan ba nyngkong ha ka pyrthei ha ka kyrdan jong ka ATP kata ha ka rta kaba 36 snem bad 321 sngi.
Ïa u Djokovic la ju ithuh kum u rangïalehkai ba kynsai bad uba paw naduh ba u la rung sha kane ka jingïalehkai. Naduh ba u la kynjoh sha ka rta kaba 30 snem ha u 2017, utei u khlur ïalehkai na Serbia u la lah ban khur ïa ka nam lahduh haduh 31 sien, kynthup ïa 12 sien ïa ka Grand Slam, 10 sien ha ka ATP Masters 1000 bad ar sien ha ka ATP Finals.
Utei u rangïalehkai ba kynsai na Serbia u la long uba trei shitom ban pynkhreh ïa ki lympung ïalehkai kat haduh ba u la long u rangïalehkai ba kynsai ha manla ki jingïakhun. Namar kata, u la long u rangïalehkai uba biang naduh ka bor met bad ka bor jabieng.
U Djokovic u la lah ban kynjoh sha ka kyrdan ba nyngkong ha ka pyrthei ha ka 4 tarik u Naitung jong u snem 2011, ha ka por ba u dangdon ha ka rta kaba 24 snem. Kiwei pat ki khlur ïalehkai kum u Federer bad u Rafael Nadal, ki la lah ban jam sha ka kyrdan ba nyngkong ha ka rta kaba 22 snem. Katba u Carlos Alcaraz u la bat ha ka ATP ha u Nailur 2022, ha ka rta kaba 19 snem.
